وزیر خارجہ کے کابل دورے کے بارے میں اہم بیان سامنے آگیا

22 اگست 2021

اسلام آباد (سچ خبریں)  تفصیلات کے مطابق وزیر خارجہ شاہ محمود قریشی کے دورہ کابل کی متضاد اطلاعات کے معاملے پر ترجمان دفتر خارجہ کا ایک بیان سامنے آیا ہے جس میں زاہد حفیظ چوہدری نے بتایا کہ وزیر خارجہ شاہ محمود قریشی کا کابل کا کوئی دورہ طے نہیں ہے ، اس حوالے سے تمام تر اطلاعات بے بنیاد ہے۔

دوسری جانب افغانستان میں انتقال اقتدار کے سلسلے میں پاکستان نے ہمسایہ ممالک کو اعتماد میں لینے کا فیصلہ کیا ہے ، سفارتی ذرائع کا کہنا ہے کہ وزیر خارجہ شاہ محمود قریشی جلد 4 ہمسایہ ممالک کا دورہ کریں گے، ان دوروں کے دوران شاہ محمود افغان صورت حال اور انتقال اقتدار سے متعلق گفتگو کریں گے ، وزیر خارجہ جن چار ممالک کا دورہ کریں گے ان میں ترکمانستان، تاجکستان، ازبکستان اور ایران شامل ہیں، وزیر خارجہ کا یہ دورہ 25 اگست سے 27 اگست تک ہوگا ، وزیر خارجہ کے 4 ملکی دورے کے انتظامات کو حتمی شکل دی جا رہی ہے ، وزیر خارجہ پاکستان اپنے دوروں میں افغانستان میں وسیع البنیاد حکومت کے قیام کی خواہش کا اعادہ کریں گے۔

علاوہ ازیں پاکستان نے افغان طالبان اور سابقہ حکمرانوں کو مشترکہ سیاسی حکومت بنانے کا مشورہ دے دیا ، وزیرخارجہ شاہ محمود قریشی کہتے ہیں کہ امن مخالف قوتیں اسپائیلرز کا کردار ادا کرنے کیلئے متحرک ہیں ، افغان طالبان اور سابقہ حکمران مشترکہ سیاسی حکومت بنائیں ، چاہتے ہیں کہ افغان طالبان اور سابقہ حکمران تمام مل بیٹھ کر ایک ایسا سیاسی ڈھانچہ تشکیل دیں جس میں سب کی شمولیت ہو اور جو سب کیلئے قابلِ قبول ہو تاکہ معاملات معمول کی جانب بڑھیں۔