نوازشریف کے پاس وطن واپسی کے علاوہ کوئی چارہ نہیں: فرخ حبیب

?️ 6 اگست 2021

اسلام آباد (سچ خبریں) وزیرِ مملکت برائے اطلاعات فرخ حبیب کا کہنا ہے کہ اب میاں صاحب کے پاس وطن واپسی کے علاوہ کوئی چارہ نہیں کیونکہ برطانوی امیگریشن نے بھی نواز شریف کو جھنڈی دکھا دی ہے نواز شریف ملک واپس آ کر سزا پوری کریں اور لوٹی ہوئی دولت واپس کریں۔

وزیرِ مملکت برائے اطلاعات فرخ حبیب نے وزیرِ اعظم عمران خان کے معاونِ خصوصی عثمان ڈارکے ہمراہ پریس کانفرنس کرتے ہوئے کہا کہ کل سے مسلم لیگ نون کی قیادت کی نیندیں اڑی ہوئی ہیں۔

انہوں نے کہا کہ نون لیگ نے جھوٹ بولنے کے ریکارڈ قائم کیئے ہیں، نواز شریف ڈھٹائی کو چھوڑیں اور وطن واپس آئیں۔فرخ حبیب کا کہنا ہے کہ انہوں نے منی لانڈرنگ کر کے ایون فیلڈ کے محلات بنائے، پلیٹ لیٹس کی رام لیلا بھی ختم ہو چکی ہے۔

وزیر ِمملکت برائے اطلاعات نے مزید کہا کہ ڈاکٹر عدنان واپس آ گئے لیکن سابق وزیرِ اعظم میاں نواز شریف واپس نہیں آئے۔ان کا یہ بھی کہنا ہے کہ نواز شریف ملک واپس آ کر سزا پوری کریں اور لوٹی ہوئی دولت واپس کریں، نواز شریف کو عدالتوں نے کرپشن پر سزا دی ہوئی ہے۔

دوسری جانب وزیراعظم عمران خان کے مشیر برائے داخلہ و احتساب شہزاد اکبر نے کہا ہے کہ ہو سکتا ہے کہ نواز شریف وہاں پر سیاسی پناہ لے لیں۔نواز شریف پاکستان واپس آ جائیں اس کے علاوہ ان کے تمام آپشن غیر قانونی ہیں۔انہوں نے اپنی صحت کے بہانے سے جو برطانیہ میں ویزا توسیع کی درخواست دی تھی وہ مسترد ہو چکی ہے۔