نادرا نے قومی شناختی قوانین میں تبدیلیاں کردیں

?️ 21 جولائی 2025

اسلام آباد: (سچ خبریں) نیشنل ڈیٹا بیس اینڈ رجسٹریشن اتھارٹی (نادرا) کی جانب سے قومی شناختی قوانین میں تبدیلیاں کردی گئیں۔ اس حوالے سے میڈیا بریفنگ کے دوران ترجمان نادرا سید شباہت علی نے کہا کہ نادرا کا ریکارڈ مکمل محفوظ ہے، پاک بھارت کشیدگی میں نادرا کے ریکارڈ سے متعلق کوئی شکایت نہیں آئی، ادارے کی جانب سے قومی شناختی قوانین میں تبدیلیاں کی گئی ہیں، پیدائش، موت، شادی اور طلاق کے سرٹیفکیٹ یونین کونسل جاری کرتی ہیں، ب فارم میں بچوں کی تصاویر شامل کی گئی ہیں۔

ان کا کہنا ہے کہ چائلڈ رجسٹریشن سرٹیفیکٹ (سی آر سی) 3 سال کے بچوں تک پرانے طریقے پرہوگا، تاہم 3 سال سے بڑے بچوں کے سی آر سی پر تصویر اور بائیو میٹرک ہوگی، 10 سے 18 سال تک نیا چائلڈ رجسٹریشن سرٹیفیکٹ تصویر اور بائیومیٹرک ہو گا، پہلے سے بنے ب فارم برقرار رہیں گے، تاہم پاسپورٹ بنانے کیلئے نیا سی آر سی بنوانا ہوگا۔

ترجمان نادرا نے مزید بتایا کہ فیملی رجسٹریشن سرٹیفیکٹ (ایف آر سی) کو قانونی دستاویز کا درجہ دے دیا گیا ہے، ایف آر سی اب وراثتی معاملات اور اہم قانونی امور کیلئے قابل قبول ہوگا، فیملی رجسٹریشن سرٹیفیکٹ خاندان کی مختلف کیٹیگریز کے مطابق ہوگا، ایف آر سی میں کسی بھی غلطی کو درست کیا جا سکتا ہے جب کہ شادی شدہ خواتین مرضی سے والد یا شوہر کا نام درج کرا سکتی ہیں، غیر قانونی طور پر حاصل شناختی کارڈ رضاکارانہ طور پر واپس کیے جا سکتے ہیں، رضاکارانہ طور پر غیر قانونی شناختی کارڈ واپس کرنے والے کے خلاف کسی قسم کی کارروائی نہیں ہوگی۔

واضح رہے کہ نادرا یعنی نیشنل ڈیٹا بیس اینڈ رجسٹریشن اتھارٹی ایک سرکاری ادارہ ہے جو پاکستانی شہریوں کی رجسٹریشن اور شناختی کارڈز جاری کرنے کا ذمہ دار ہے، اس مقصد کے لیے نادرا کا قیام 2000ء میں عمل میں لایا گیا، اس کا بنیادی کام پاکستانی شہریوں کا ڈیٹا بیس بنانا اور انہیں قومی شناختی کارڈ (سی این آئی سی) جاری کرنا ہے اس لیے اپنے قیام کے بعد سے نادرا پاکستان میں شہریوں کی شناخت اور رجسٹریشن کے نظام میں ایک اہم کردار ادا کرتا ہے، نادرا شناختی کارڈ بنانے کے علاوہ مختلف دیگر خدمات بھی فراہم کرتا ہے جن میں چائلڈ رجسٹریشن سرٹیفیکٹ (سی آر سی) اور فیملی رجسٹریشن سرٹیفکیٹ (ایف آر سی ) کا اجراء نمایاں ہے۔