مہنگائی سے متعلق وزیر خزانہ شوکت ترین کا اہم بیان

?️ 16 اکتوبر 2021

واشنگٹن(سچ خبریں) واشنگٹن میں پریس کانفرنس کرتے ہوئے وزیر خزانہ شوکت ترین  نے مہنگائی میں کمی نہ ہونے سے خبر دار کردیا اور کہا ہے  کہ تیل سمیت دیگر اشیا دنیا بھر میں مہنگی ہو رہی ہیں اور کیوں ہورہی ہیں اس کی  وجہ معلو م نہیں۔ کورونا وبا کے اثرات کم ہوں گے تو مہنگائی نیچے آئے گی۔

وزیر خزانہ نے کہا ہے کہ کورونا وبا کے اثرات کم ہوں گے تو مہنگائی نیچے آئےگی ، ملک کی 40 فیصد آبادی کو ٹارگٹڈ سبسڈی دیں گے۔ شوکت ترین کا کہنا تھا کہ ہمارے پاس ڈیٹا بیس آگیا ہے جس سے پتا لگایا جاسکتا ہے کہ ہرگھرمیں آمدن کتنی ہے، اگلے 4 سے 5 سال میں ٹیکس ٹو جی ڈی پی شرح 20 فیصد تک لے کر جائیں گئے، توانائی سیکٹر  کے لیے معاہدے ہو چکے ہیں۔

انہوں نے مزید کہا کہ عالمی مالیاتی  ادارے (آئی ایم ایف) سے ایک ارب ڈالر ملنے کی توقع ہے،آئی ایم ایف کو اعدادو شمار دے دیے ہیں وہ آئندہ دو چار روز میں توثیق کریں گے۔ شوکت ترین کا کہنا تھا کہ امریکی نائب معاون وزیرخارجہ سے ملاقات میں کہا ہے کہ غلطیاں دونوں اطراف سے ہوئیں، اب آگے بڑھنا چاہیے خیال رہے کہ وزیر خزانہ ان دنوں امریکا میں ہیں۔