فیلڈ مارشل بنانے کے فیصلے کو تاریخ پرکھے گی اور اپنا فیصلہ دے گی، مصطفیٰ نواز کھوکھر کا تبصرہ

?️ 21 مئی 2025

اسلام آباد: (سچ خبریں) ملک کے سینئر سیاستدان مصطفیٰ نواز کھوکھر کا کہنا ہے کہ جنرل عاصم منیر کو فیلڈ مارشل بنانے کے فیصلے کو تاریخ پرکھے گی اور اپنا فیصلہ دے گی۔

مختلف ٹی وی ٹاک شوز میں گفتگو کرتے ہوئے انہوں نے کہا کہ فیلڈ مارشل بنانے کے فیصلے کو تاریخ پرکھے گی اور پھر جب وقت گزرے گا تب تاریخ اس تعیناتی پر اپنا فیصلہ دے گی، باقی یہ مت سمجھیں کہ جنگ ختم ہو گئی ہے، ابھی صرف سیزفائر ہوا ہے، اس لحاظ سے مجھے یہ فیصلہ کچھ جلد بازی میں کیا گیا نظر آتا ہے۔

مصطفیٰ نواز کھوکھر کہتے ہیں کہ پاکستان اور بھارت کی جنگ سے حکومت کی مقبولیت میں کوئی اضافہ نظر نہیں آتا جنہوں نے جہاز اڑائے اور میزائل چلائے ان کو مقبولیت ملی ہے ہم اس کو تسلیم بھی کرتے ہیں لیکن فارم 47 والوں کو اور ان کی مقبولیت کو کوئی تسلیم نہیں کرتا کیوں کہ اقتدار والی جماعت کے سربراہ نواز شریف نے پاکستان اور بھارت کی جنگ پر ایک لفظ بھی کہنا مناسب نہیں سمجھا، یہ نواز شریف کو زیب نہیں دیتا، اگر نواز شریف کا بلاول سے موازنہ کریں تو بلاول بہت اچھا بولا ہے اور عالمی سطح پر یہ مقدمہ پیش کیا۔

ان کا کہنا ہے کہ اس حکومت کی مقبولیت میں تو اضافہ کہیں بھی نہیں ہوا بلکہ لوگوں نے سوال اُٹھائے ہیں کہ جب ملک پر جنگ مسلط کی گئی تو ن لیگ کی حکومت غائب تھی، لوگوں نے اس فارم 47 کی حکومت کو تسلیم نہیں کیا لیکن اپوزیشن کے پاس ابھی حکومت مخالف تحریک چلانے کیلئے مومینٹم نہیں ہے، مومینٹم کیلئے چند ماہ درکار ہوں گے، آنے والے بجٹ میں حکومت غلطیاں کرے گی، عوام کو ریلیف نہیں دے پائے گی اور جب اس طرح کی چیزیں مل کر مومینٹم بنائیں گی تب اپوزیشن کےباہر نکلنے کا وقت ہوگا۔