فیاض الحسن نے اپوزیشن کی جانب سے کیمرے نصب کرنےکے الزام کو  اپوزیشن کا نیا ہتھکنڈاقرار دیا

?️ 12 مارچ 2021

لاہور(سچ خبریں) وزیر جیل خانہ جات پنجاب فیاض الحسن چوہان نے سینیٹ الیکشن کے لئے کیمرے نصب کرنے کے الزام پر برہمی کا اظہار کرتے ہوئے کہا کہ  اپوزیشن ہار سے بچنے کے لیے میکاولی، چانکیا اور گوئبلزکی سیاست پر اتر آئی ہے۔ یقینی ہار سے بچنے کیلئے کیمرے نصب کرنے کا بھونڈا الزام اپوزیشن کا نیا ہتھکنڈا ہے۔

تفصیلات کے مطابق لاہور میں میڈیا سے گفتگو کرتے ہوئے فیاض چوہان نےاپوزیشن پر شدید ترننقید کرتے ہوئے کہا کہ انہیں بیلٹ باکس کے اوپر لگے کیمرے کے متعلق الہام ہوا تھا، ان کا کہنا تھا کہ اپوزیشن ممبران کا اسی کیمرے پر اعتراض اٹھانا انہیں مشکوک بنا رہا ہے۔

فیاض الحسن چوہان نے کہا کہ  قوی امکان ہے کہ یہ حرکت اپوزیشن نے اپنی یقینی ہار کو متنازع بنانے کیلئے کی ہے۔انہوں نے کہا کہ اپوزیشن کو مشورہ ہے کہ اوچھے ہتھکنڈوں کی بجائے جمہوری اقدار کی پابندی کرے۔فیاض چوہان نے کہ الیکشن کمیشن فوری طور پر مکمل تحقیقات کرکے ذمہ داران کو سزا دے۔

واضح رہے کہ سابق وزیراعظم شاہد خاقان عباسی نے حکومت پر الزام عائد کرتے ہوئے کہا کہ سینیٹ الیکشن کے لئے وفاقی حکومت نے کیمرے لگائے اور انہوں نے اپنے میں سینیٹ الیکشن میں کمیرے لگانے کو خلاف آئین اقدام قرار دیا ہے۔

ایک بیان میں شاہد خاقان عباسی نے استفسار کیا کہ سینیٹ الیکشن 2021ء میں کیمرے کس نے لگائے؟انہوں نے کہا کہ سیدھی بات یہ ہے کہ سینیٹ الیکشن کے لیے کیمرے لگانے کے معاملے میں وزیراعظم عمران خان اور سابق چیئرمین سینیٹ ملوث ہیں۔

سابق وزیراعظم نے مزید کہا کہ آئین کا آرٹیکل226 کہتا ہے الیکشن خفیہ ہوں گے، ووٹ کی سیکریسی کو توڑنا ملک کے آئین کی خلاف ورزی ہے۔اُن کا کہنا تھا کہ وزیر اعظم، سابق چیئرمین سینیٹ، اسٹاف، قومی اسمبلی کی سیکیورٹی کے لوگ آئین توڑنے میں ملوث ہیں۔