فلسطین کی سنگین صورتحال پروزیر اعظم اور مہاتیرمحمد کا ٹیلیفونک رابطہ

?️ 17 مئی 2021

اسلام آباد(سچ خبریں)فلسطین کی موجودہ سنگین صورتحال پر  وزیراعظم عمران خان سے سابق ملائیشین وزیراعظم مہاتیر محمد کے درمیان ٹیلیفونک رابطہ ہوا ہے جس میں  دونوں رہنماؤں نے فلسطینی عوام کے خلاف  اسرائیلی جارحیت کے بارے میں تبادلۂ خیال کیا اور فلسطینیوں سے یکجہتی کا اظہار کیا۔

تفصیلات کے مطابق وزیراعظم عمران خان اور سابق ملائیشین وزیراعظم مہاتیر محمد نے ٹیلیفونک گفتگو میں اسرائیلی جارحیت کی شدید مذمت کی اور نہتے فلسطینیوں سے یکجہتی کا اظہار کیا۔وزیراعظم عمران خان نے مسجد اقصیٰ میں معصوم نمازیوں پر حملوں کو شرمناک قرار دیا۔

دونوں رہنماؤں نے غزہ پر اسرائیلی میزائل حملوں کی بھی شدید مذمت کی، دونوں رہنماؤں میں اتفاق کیا گیا کہ عالمی برادری اسرائیلی جارحیت روکنے کے لیے ہنگامی اقدامات کرے۔انہوں نے کہا کہ فلسطینی شہریوں کی حفاظت اور اقوام متحدہ کی قراردادوں پر سمجھوتہ نہیں ہونا چاہیے۔

دوسری جانب وزیر خارجہ شاہ محمود قریشی کا امریکی ہم منصب انتھونی بلنکن سے ٹیلیفونک رابطہ ہوا، شاہ محمود قریشی نے اسرائیلی انسانی حقوق کی پامالیوں پر پاکستانی قوم کے اضطراب سے آگاہ کیا۔دونوں رہنماؤں نے دو طرفہ اور اہم علاقائی امور پر مشاورت جاری رکھنے پر اتفاق کیا۔

دوسری جانب فلسطین پر اسرائیلی بمباری اور حملوں کے خلاف کراچی، لاہور اور کوئٹہ سمیت ملک کے مختلف شہروں میں ریلیاں نکالی گئیں اور مظاہرے کیے گئے۔مظاہرین نے اسرائیلی فوج کی بمباری کی اور ان سے ہونے والی شہادت کی مذمت کرتے ہوئے مسلم سربراہوں سے آگے بڑھ کر فلسطین کے لیے آواز اٹھانے کا مطالبہ کیا۔