عوام سے کئے گئے وعدوں کو پورا کیا جائے گا: گورنرپنجاب

?️ 21 فروری 2022

اسلام آباد (سچ خبریں)پنجاب گورنر چوہدری سرور کا کہنا ہے کہ اتحادیوں کے ساتھ مل کر عوام سے کیے جانے والے وعدوں کو پورا کیا جائے گا،ملک کو عدم استحکام کا شکار کرنے کی سازشیں کرنے والے سیاسی مخالفین کے منصوبے کو ناکام بنایا جائے گا۔ حکومت وزیراعظم کی قیادت میں اتحادیوں کو ساتھ لے کر چل رہی ہے ۔

تفصیلات کے مطابق 92 نیوز کی رپورٹ کے مطابق گورنر چوہدری سرور نے حکومت کا بھرپور ساتھ دینے کے لیے وفاقی وزیر چوہدری مونس الہیٰ کے دوٹوک موقف کو سراہا۔گورنر سرور اور حکومتی اتحادی جماعت ق لیگ کے وفاقی وزیر چوہدری مونس الہیٰ کے درمیان ملاقات میں سیاسی حکومت سمیت دیگر امور کے بارے میں بات چیت کی گئی جب کہ گورنر سرور سے وفاقی وزراء غلام سرور خان اور برگیڈئیر (ر) اعجاز شاہ بھی ملے اور حکومتی اور سیاسی امور کے حوالے سے مشاورت کی گئی۔

گورنر سرور نے وفاقی وزراء سے ملاقات کے دوران کہا کہ حکومت وزیراعظم کی قیادت میں اتحادیوں کو ساتھ لے کر چل رہی ہے اور اتحادیوں کے ساتھ مل کر عوام سے کیے جانے والے وعدوں کو پورا کیا جائے گا۔

ملک کو عدم استحکام کا شکار کرنے کی سازشیں کرنے والے سیاسی مخالفین کے منصوبے کو ناکام بنایا جائے گا۔دوسری جانب مونس الٰہی کی وزیراعظم کو ساتھ نبھانے کی یقین دہانی پر سیاست دانوں میں ہلچل مچل گئی۔حکومت کی اتحادی جماعت مسلم لیگ ق کے رہنما اور وفاقی وزیر مونس الہٰی نے کہا ہے کہ آج کل تماشا چل رہا ہے یہ جو بھی باتیں ہو رہی ہیں، وزیراعظم سے گزارش ہے ایک بار پی ٹی آ ئی والوں کو تگڑے طریقے سے کہہ دیں گھبرانا نہیں ہے۔

ہائیڈرو پاور ڈویلپمنٹ سے متعلق منعقدہ بین الاقوامی سمپوزیم سے خطاب میں مونس الہٰی نے کہا کہ وہ سیاسی لوگ ہیں ان کا کام ہے لوگوں سے ملنا، جو گھر آئے اس کا خیر مقدم کرنا ہے۔ انہوں نے کہا کہ سیاسی لوگ تعلقات بناتے اور تعلقات نبھاتے ہیں، ہمارا جناب سے تعلق بنا ہے اور وہ ہم نے نبھانے کے لیے بنایا ہے۔