عطا تارڑ کا این اے-127 میں پیپلز پارٹی پر ووٹوں کی خریداری کا الزام

عطا تارڑ نے کہا کہ میں اپنے حلقے میں ووٹوں کی خریداری نہیں ہونے دوں گا اور مبینہ دھاندلی پر الیکشن کمیشن کو درخواست دے دی ہے۔

انہوں نے مزید کہا کہ بلاول بھٹو پنجاب میں انتشار اور کرپشن کو فروغ دینا چاہتے ہیں، ہماری قیادت نے ہمیشہ صاف ستھری سیاست کی ہے، ہم نے نوٹوں نہیں بلکہ ہمیشہ ووٹوں کی سیاست کی۔

مسلم لیگ(ن) کے رہنما کا کہنا تھا کہ بلاول بھٹو کی نگرانی میں ووٹوں کی خریداری ہورہی ہے، الیکشن ایکٹ اور آئین کی خلاف ورزی کررہے ہیں، لاڈلے کو رکن قومی اسمبلی بنانے کے لیے اوچھے ہتھکنڈے استعمال کیے جارہے ہیں۔

ان کا کہنا تھا کہ یہ پیسہ سندھ کی عوام کا حق تھا جو ان سے چھینا گیا، وہاں پر آج سڑکیں ٹوٹی ہوئی ہیں اور لوگوں کی جان و مال محفوظ نہیں ہے، وہاں لوگوں کا کوئی پرسان حال نہیں ہے۔

انہوں نے مزید کہا کہ بلاول بھٹو انتخابی مہم میں کہیں نظر نہیں آرہے، ہم تو حلقے کے کونے کونے میں گئے ہیں، میں یہ سمجھنے سے قاصر ہوں کہ آپ حلقے میں جاتے نہیں، عوام کو ملتے نہیں، نہ ڈور ٹو ڈور کمپین کررہے ہیں نہ کارنر میٹنگز کررہے ہیں، صرف اور صرف پیسے کے سہارے بیٹھے ہیں کہ کسی طریقے سے ووٹ خریدے جائیں۔

واضح رہے کہ قومی اسمبلی کے حلقہ این اے۔127 سے پیپلز پارٹی چیئرمین بلاول بھٹو بھی الیکشن لڑ رہے ہیں۔

دوسری جانب چیف الیکشن کمشنر نے سیاسی جماعت کی طرف سے ووٹوں کی مبینہ خرید و فروخت کا نوٹس لے لیا۔

چیف الیکشن کمشنر نے پنجاب کے صوبائی الیکشن کمشنر کو واقعات کی تحقیقات کر کے رپورٹ فوری جمع کرانے کے احکامات جاری کر دیے ۔