صحت انصاف کارڈ کے نظام کی مزید بہتری کے لئے  وزیراعظم کا اہم فیصلہ

?️ 4 ستمبر 2021

اسلام آباد (سچ خبریں) وزیراعظم عمران خان نے صحت انصاف کارڈ  کے نظام کی مزید بہتری  اور اس سے متعلق شہریوں کے مسائل کو پاکستان سٹیزن پورٹل سے منسلک کرنے کا فیصلہ کرلیا اور سیٹیزن پورٹل پر صحت انصاف کارڈ کے نام سے خصوصی کیٹگری مختص کردی۔اس حوالے سے ہدایت نامہ بھی جاری کر دیا ہے۔

تفصیلات کے مطابق صحت انصاف کارڈ کے نظام کی مزید بہتری کے لیے وزیراعظم نے اہم فیصلہ کرتے ہوئے صحت انصاف کارڈ سے متعلق شہریوں کے مسائل کو پاکستان سٹیزن پورٹل سے منسلک کردیا۔سیٹیزن پورٹل پر صحت انصاف کارڈ کے نام سے خصوصی کیٹگری مختص کردی ہے ، اس حوالے سے وزیراعظم کی ہدایت پر وزیراعظم ڈیلیوری یونٹ نے ہدایت نامہ جاری کر دیا ہے۔

وزیراعظم آفس کا کہنا ہے کہ اسپتالوں میں علاج سہولتوں اورعملےسےمتعلق سمیت اخراجات کی عدم معلومات،تاخیر اورغلط علاج پر بھی شکایات کی جاسکیں گی، صحت کارڈ کے پینل میں شامل اسپتالوں کے مسائل پر بھی شکایات درج کرائی جاسکیں گی۔

واضح رہے کہ شکایات کےفوری ازالے کے لیے اسٹیٹ لائف کےاعلی افسران کو خصوصی ڈیش بورڈ الاٹ کردی ہے اور وزیراعظم نے ہدایت کی ہے کہ چئیرمین اسٹیٹ لائف شہریوں کی شکایات کے فوری حل کو یقینی بنائیں گے۔