حکومت پاکستان کی صیہونی حکومت کے ساتھ کسی بھی قسم کی تجارت کی تردید

?️ 3 اپریل 2023

سچ خبریں:پاکستان کی وزارت تجارت نے ایک بیان جاری کرتے ہوئے صیہونی حکومت کے ساتھ تجارتی تعلقات کے بارے میں حالیہ افواہوں کی تردید کی اور تاکید کی کہ پاکستان کبھی بھی صیہونی حکومت کے ساتھ تجارتی تبادلے نہیں چاہتا۔

پاکستانی ذرائع ابلاغ کی رپورٹ کے مطابق حال ہی میں بعض ذرائع ابلاغ میں یہ خبریں شائع ہوئی ہیں کہ پاکستانی شہریت کا حامل ایک یہودی شہری متحدہ عرب امارات کے راستے مقبوضہ فلسطین میں خشک میوہ جات برآمد کرنے کی کوشش کر رہا ہے جس کے بعد وزارت تجارت نے ایک بیان میں کہا کہ یہ اطلاعات افواہوں کے سوا کچھ نہیں ہیں اور پاکستانی حکومت کی طرف سے ان کی کبھی تصدیق نہیں کی جائے گی۔

اس بیان میں کہا گیا ہے کہ پاکستان کے نہ تو اسرائیل کے ساتھ تجارتی تعلقات ہیں اور نہ ہی ایسا کرنے کا کوئی ارادہ ہے نیز حکومت پاکستان نے اس شعبے میں کسی فرد کے انفرادی عمل کی حمایت نہیں کی ہے اور نہ ہی اسرائیل سے متعلق کوئی سرکاری چینل یا بینک ہے۔

پاکستان کی وزارت تجارت نے اس بات پر زور دیا کہ اس ملک نے متحدہ عرب امارات کے ساتھ تجارتی مذاکرات میں اس مسئلے کی سنجیدگی سے پیروی کی ہے، پاکستان کی وزارت خارجہ کی ترجمان ممتاز زہرا نے صیہونی حکومت کے ساتھ تجارت سے متعلق رپورٹس سامنے آنے پر ردعمل کا اظہار کرتے ہوئے انہیں سختی سے مسترد کردیا۔

ممتاز زہرا نے کہا کہ پاکستان کے صیہونی حکومت کے ساتھ سفارتی یا تجارتی تعلقات نہیں ہیں اور اس حکومت کے بارے میں اسلام آباد کی پالیسی میں کوئی تبدیلی نہیں آئی ہے۔

یاد رہے کہ حالیہ دنوں میں پاکستانی شہریت کے حامل ایک یہودی شہری کی جانب سے متحدہ عرب امارات کے راستے مقبوضہ فلسطین میں پاکستانی اشیائے خوردونوش برآمد کرنے کے اقدام کے بارے میں کچھ رپورٹس کے منظر عام پر آنے نے پاکستان کے سیاسی اور مذہبی رہنماؤں میں شدید تشویش پیدا کی ہے۔