بھارت کو مسلسل ہزیمت کا سامنا، غیر ملکی دانشور بھی پاکستان کی کامیابیوں کے معترف ،امریکی پروفیسر نے مودی سرکار کو آئینہ دکھا دیا

?️ 24 مئی 2025

اسلام آباد (سچ خبریں) بھارت کو معرکۂ حق میں شکست کے بعد مسلسل ہزیمت کا سامنا، امریکی پروفیسر نے مودی سرکار کو آئینہ دکھا دیا۔

تفصیلات کے مطابق غیرملکی دانشور بھی پاکستان کی کامیابیوں کے معترف ہیں، بھارتی ٹی وی کے پروگرام کے دوران پروفیسر کرسٹین فیئر کا کہنا تھا کہ بھارت پاکستان کو ہر ممکن کوشش کے باوجود خوفزدہ نہیں کرسکا۔ ڈیٹرنس کا اندازہ اس ملک کے رویئے سے لگایا جاتا ہے جسے روکنے کی کوشش کی جا رہی ہو، موجودہ حالات میں ایسا کوئی ثبوت نہیں کہ پاکستان نے اپنی پوزیشن ترک کی ہو یا مؤقف سے پیچھے ہٹا ہو۔ بھارت نے بے بنیاد دعوے کرکے خود کو ایک خطرناک صورتحال میں ڈال دیا ہے۔ بھارت کے اندر میڈیا، خاص طور پر جنہیں میں ’’فسادی میڈیا‘‘ کہتی ہوں، نے عوام کو غلط معلومات فراہم کی ہیں۔

ذرائع کے مطابق پروفیسر کرسٹین فیئر نے یہ بھی کہا کہ حقیقت یہ ہے کہ بھارت نے پاکستان کو کسی ناکامی سے دوچار کرسکا اور نہ ہی اسے خوفزدہ کرسکا ہے، پاکستان پیچھے نہیں ہٹا اور نہ ہی وہ بھاگا ہے۔ یہ تنازعہ بھارت کی توقع سے کہیں زیادہ تیزی سے شدت اختیار کر گیا، بھارت خود بھی چاہتا تھا کہ تنازعے کو کم کرنے کے لیے کوئی محفوظ راستہ نکالا جائے۔ بدقسمتی سے بھارتی بے لگام میڈیا عوام میں ایسی توقعات پیدا کرتا ہے جو بعد میں عسکری تقاضوں کو جنم دیتی ہیں، بھارت اور اس کا میڈیا جنگجویانہ رویہ رکھتے ہیں۔