بلوچستان میں دہشتگردوں کا فوجی دستے پر حملہ

?️ 24 نومبر 2021

راولپنڈی (سچ خبریں) فوج کے شعبہ تعلقات عامہ کے مطابق دہشت گردوں نے سبی کے علاقے سنگان میں ایف سی دستے کو نشانہ بنایا ، جس کے نتیجے میں 5 جوان شہید ہوگئے ، شہدا میں حوالدار ظفر علی خان،لانس نائیک ہدایت اللہ اور لانس نائیک ناصر عباس شامل ہیں جب کہ لانس نائیک بشیراحمد اورسپاہی نوراللہ بھی فائرنگ تبادلے میں جام شہادت نوش کرگئے۔
آئی ایس پی آر کی جانب سے بتایا گیا ہے کہ دہشت گردوں نے سنگان میں ایف سی کی پٹرولنگ پارٹی کونشانہ بنایا ، جس کے نتیجے میں ہونے والے فائرنگ کے تبادلے میں دہشت گردوں کا بھاری جانی اور مالی نقصان ہوا ، جس کے بعد دہشت گردوں نے فرار کا راستہ اختیار کیا تاہم ملک دشمنوں کی جلد از جلد گرفتاریوں کے لیے سرچ آپریشن شروع کردیا گیا ، ایسے بزدلانہ حملے بلوچستان کے امن اورخوشحالی کوسبوتاژ نہیں کرسکتے۔

خیال رہے کہ چند روز قبل ہی صوبہ بلوچستان کےعلاقے ہلمرگ میں بھی سیکیورٹی فورسز کے خفیہ اطلاعات کی بنیاد پر آپریشن کے نتیجے میں 2 دہشت گرد مارے گئے ، آئی ایس پی آر کے مطابق سکیورٹی فورسز کی طرف سے کیے گئے آپریشن کے نتیجے میں دہشت گردوں سے بھاری مقدار میں اسلحہ اوربارود برآمد ہوا ، دہشت گرد شہریوں اور فورسز کے خلاف پرتشدد کارروائیوں میں ملوث تھے، فائرنگ کے تبادلے میں ایف سی کا بہادر سپاہی فدا الرحمان شہید ہوگیا، جس کا تعلق چترال کے علاقے مستوج سے بتایا گیا۔
اس سے پہلے صوبہ بلوچستان کے ضلع آواران میں بھی خفیہ آپریشن کے دوران سیکیورٹی فورسز کے ساتھ فائرنگ کے تبادلے میں 10 دہشت گرد مارے گئے تھے ، ہلاک ہونے والے دہشتگرد سیکیورٹی فورسز پر فائرنگ میں ملوث تھے ، جب کہ اس سے قبل بلوچستان کے ایک اور علاقے کیچ میں سیکیورٹی فورسز نے خفیہ آپریشن کیا ، آپریشن کے دوران 2 دہشت گرد مارے گئے ، ہلاک دہشت گرد سیکیورٹی فورسز پر حملوں اور شہریوں کے قتل میں ملوث تھے۔