اسلام آباد(سچ خبریں)وفاقی وزیر اطلاعات فواد چوہدری کا کہنا ہے کہ بلوچستان میں بھارت کا دہشت گردی نیٹ ورک توڑنے میں ہم کافی حدتک کامیاب ہوچکے ہیں، اب بات چیت کا ایجنڈا طے کیا جائے گا۔وفاقی حکومت بلوچستان میں ترقیاتی منصوبے مکمل کرے گی۔
تفصیلات کے مطابق وفاقی وزیر اطلاعات فواد چوہدری نے سماجی رابطے کی ویب سائٹ ٹوئٹر اپنے بیان میں کہا ہے کہ بلوچستان میں بھارت کا دہشت گردی نیٹ ورک کافی حدتک توڑدیا، اب قوم پرستوں کے ساتھ بات چیت کا ایجنڈا طے کیا جائے گا۔
فواد چوہدری کا کہنا تھا کہ بلوچستان میں وفاقی حکومت731ارب کے131منصوبےمکمل کرےگی، صوبائی حکومت کاترقیاتی پروگرام صرف اس سال180 ارب کا ہے، بلوچستان عمران خان کے دل کے قریب ہے۔
بلوچستان میں ہندوستان کا دہشت گردی کا نیٹ ورک کافی حد تک توڑ دیا ہے اب قوم پرستوں کے ساتھ بات چیت کا ایجنڈا طے کیا جائیگا،بلوچستان میں وفاقی حکومت 731 ارب کے 131 منصوبے مکمل کرے گی، صوبائ حکومت کا ترقیاتی پروگرام صرف اس سال 180 ارب کا ہے۔
یاد رہے گذشتہ روز گوادر دورے کے موقع پر مقامی عمائدین، طلبہ اور کاروباری شخصیات سے خطاب میں کرتے ہوئے وزیراعظم عمران خان نے کہا تھا کہ میں سوچ رہا ہوں علیحدگی کی تحریکیں چلانے والوں سے بھی بات کروں، ایسے لوگوں کو بھارت جیسے ممالک اپنے مفاد کے لیے استعمال کرتے ہیں۔