بلوچستان آپریشن میں فتنہ الخوارج کے 47 دہشتگرد جہنم واصل ہوئے۔ سکیورٹی ذرائع

?️ 26 اگست 2025

راولپنڈی (سچ خبریں) سکیورٹی فورسز نے دو ہفتے قبل بڑے آپریشن میں فتنہ الخوارج کے 47 دہشت گردوں کو جہنم واصل کیا۔

سکیورٹی ذرائع کے مطابق 9 اگست کو سکیورٹی فورسز نے فتنہ الخوارج کی ایک بڑی تشکیل جو سمبازا، بلوچستان کے علاقے میں بارڈر کراس کرنے کی کوشش کر رہی تھی، کو موثر کارروائی کے بعد جہنم واصل کیا۔

اسی طرح 7تا 9 اگست کو سکیورٹی فورسز نے آپریشن میں فتنہ الخوارج کے 47 دہشت گردوں کو جہنم واصل کیا، مارے جانے والے زیادہ تر دہشت گرد افغان تھے، بارڈر پر فتنہ الخوارج کے ہلاک زیادہ تر دہشت گردوں کی لاشیں افغانستان کی طرف گری تھیں۔

ذرائع نے بتایا کہ مارے جانے کے پندرہ دن بعد بھی افغانستان سے اِن جہنم واصل دہشت گردوں کی لاشیں اٹھانے کوئی نہیں آیا، اِس دوران دہشت گردوں کی لاشیں افغانستان سائیڈ پر گلتی سڑتی رہیں، 25 اگست کو بارڈر پر افغان حکام کے ساتھ جرگہ کے بعد ان لاشوں کو گدھوں پر لاد کر لے جایا گیا۔

سکیورٹی ذرائع کا کہنا تھا کہ لمبا عرصہ دھوپ اور باہر کھلے میں پڑے رہنے والے فتنہ الخوارج کے جہنم واصل 47 دہشت گرد گوشت خور جانوروں کی بھوک بھی مٹاتے رہے۔

ذرائع نے مزید بتایا کہ فتنہ الخوارج کی اس بڑی تشکیل کو کسی بھی دہشت گردانہ کارروائیوں سے پہلے ہی ٹھکانے لگا دینا سکیورٹی اور انٹیلی جنس اداروں کی بڑی کامیابی ہے۔