اوگرا نے پٹرول مہنگا ہونے کا عندیہ دے دیا

?️ 23 فروری 2022

اسلام آباد(سچ خبریں) چئیرمین اوگرا نے یکم مارچ سے پٹرول مہنگا ہونے کا عندیہ دے دیا۔اس حوالے سے چئیرمین آئل اینڈ گیس ریگولیٹری اتھارٹی سرور خان نے یکم مارچ سے پٹرولیم مصنوعات کی قیمتیں بڑھنے کا عندیہ دیتے ہوئے کہا بارہ ہفتوں میں تیل کی قیمت جو بڑھی ہے اس کی نظیر نہیں ملتی، ڈالر کے مقابلے میں روپے کی قدر بہت کم ہو گئی۔

تفصیلات کے مطابق قومی اسمبلی کی قائمہ کمیٹی برائے پٹرولیم کا اجلاس عمران خٹک کی زیر صدارت ہوا۔گیس اسکیموں پر کام نہ ہونے پر ن لیگی ممبران نے غصے کا اظہار کیا۔سیکرٹری پٹرولیم مصنوعات ڈویژن نے کہا کہ گیس کی اسیکموں پر عائد پابندی کو ہٹانے پر غور کیا جا رہا ہے،آنے والے ہفتوں میں ایل این جی کی قلت سے متعلق سوال کے جواب میں سیکرٹری پٹرولیم نے بتایا کہ دو ایل این جی کارگوز منسوخ ہوئے تھے جن میں سے ایک کارگو کا بندوبست کر لیا گیا لیکن اس کا ٹینڈر مہنگا ملا۔

چئیرمین آئل اینڈ گیس ریگولیٹری اتھارٹی سرور خان نے یکم مارچ سے پٹرولیم مصنوعات کی قیمتیں بڑھنے کا عندیہ دیتے ہوئے کہا کہ بارہ ہفتوں میں تیل کی قیمت جو بڑھی ہے اس کی نظیر نہیں ملتی، ڈالر کے مقابلے میں روپے کی قدر بہت کم ہو گئی، خزانے میں جو پیسے آتے ہیں وہ کمپرومائز ہو رہے ہیں قیمتیں بڑھیں گی تو اس کا بوجھ عوام پر پڑے گا۔یہاں واضح رہے کہ روسی صدر کے یوکرین میں ’امن فوج‘ داخل کرنے کے اعلان کے بعد عالمی مارکیٹ میں تیل مہنگا ہو گیا۔

عالمی مارکیٹ میں تیل کی قیمتیں 100 ڈالر فی بیرل کے قریب پہنچ گئی ہیں اور لندن برینٹ خام تیل 99 ڈالر کی سطح عبور کر گیا۔دورانِ ٹریڈنگ لندن برینٹ خام تیل 99ڈالر 25 سینٹس میں فروخت ہوا جب کہ ڈبلیو ٹی آئی خام تیل 96 ڈالر فی بیرل کی سطح پر موجود ہے۔

دوسری جانب پٹرولیم مصنوعات کی قیمتوں میں اضافے کے آفٹر شاکس جاری ہیں۔صوبائی دارالحکومت لاہور کی مارکیٹوں اور عام بازاروں میں برائیلر مرغی کے گوشت کی قیمت میں مزید 15 روپے فی کلو کا اضافہ کردیا گیا ہے اس اضافے کے بعد بازاروں میں برائیلر مرغی کے گوشت کی قیمت 335 روپے فی کلو جبکہ پرچون کی سطح پر زندگی مرغی کی قیمت 231 روپے فی کلو ہوگئی ہے۔