ملک کیسے ترقی کرے گا؟: بیرسٹر سیف

?️ 1 جولائی 2024

سچ خبریں: خیبر پختونخوا کے مشیر اطلاعات بیرسٹر سیف کا کہنا ہے کہ بانی چیئرمین پی ٹی آئی عمران خان اور پارٹی کارکنوں کی رہائی کے بغیر ملک ترقی نہیں کر سکتا۔

سربراہ جے یو آئی مولانا فضل الرحمان کے نئے انتخابات سے متعلق بیان پر ردعمل دیتے ہوئے بیرسٹر سیف نے کہا کہ موجودہ الیکشن کمیشن کے تحت شفاف انتخابات کا انعقاد ممکن نہیں ہے۔

یہ بھی پڑھیں: عمران خان سمیت پی ٹی آئی کے گرفتار رہنماؤں کی رہائی کیلئے قومی اسمبلی میں قرارداد جمع

انہوں نے کہا کہ مولانا فضل الرحمان کو جعلی حکومت کے خلاف تحریک کا آغاز کرنا چاہیے۔ پہلے انتخابات کے لیے سازگار ماحول بنانا ضروری ہے، کیونکہ الیکشن کے نتائج فارم 47 کے ذریعے متاثر کیے گئے۔

مشیر اطلاعات کے پی نے کہا کہ موجودہ چیف الیکشن کمشنر کو آئین شکنی کی مناسب سزا دینی چاہیے اور فارم 47 کے سازشی عناصر کو بھی سخت سزا ملنی چاہیے۔

بیرسٹر سیف نے مزید کہا کہ موجودہ حکومت نے ملک کو مسائل کی دلدل میں دھکیل دیا ہے۔

انہوں نے کہا کہ بانی پی ٹی آئی اور کارکنوں کی رہائی کے بغیر ملک ترقی نہیں کر سکتا۔ بانی پی ٹی آئی کے بغیر نئے انتخابات نامکمل اور ناقابل قبول ہوں گے۔

مزید پڑھیں: 190 ملین پاؤنڈ ریفرنس: بانی پی ٹی آئی عمران خان کی ضمانت منظور

یاد رہے کہ گزشتہ روز جے یو آئی کے سربراہ مولانا فضل الرحمان نے ایک انٹرویو میں کہا تھا کہ ملک میں فوری طور پر نئے اور شفاف انتخابات کروائے جائیں اور اسٹیبلشمنٹ کو اس معاملے سے دور رہنا چاہیے۔