دنیا بھر میں انسٹاگرام سروس ڈاؤن، میمز کی بھرمار

?️ 22 مارچ 2024

سچ خبریں: پاکستان سمیت دنیا بھر میں 21 اور 22 مارچ کی درمیانی شب اور پھر آج صبح سوشل میڈیا بلاگنگ سائٹ انسٹاگرام کی سروس اچانک ڈاؤن ہوگئی جس کے کچھ دیر بعد اسے بحال کردیا گیا۔

سوشل میڈیا پلیٹ فارمز کی بندش پر نظر رکھنے والی ویب سائٹ ڈاؤن ڈیٹیکٹر کے مطابق آج صبح 6 بجکر 30 منٹ پر انسٹاگرام کے بندش کی 488 رپورٹس موصول ہوئیں جبکہ دنیا بھر میں ہزاروں صارفین اپنے انسٹاگرام اکاؤنٹس سے خود بخود لاگ آؤٹ ہوگئے۔

رپورٹ کے مطابق 70 فیصد صارفین کو بلاگنگ سائٹ انسٹاگرام پر لاگ اِن میں مشکلات کا سامنا کرنا پڑا، جبکہ 11 فیصد صارفین کو سرور کنکشن کے مسائل کا سامنا ہے۔

ویب سائٹ کے مطابق امریکا سے 5 ہزار سے زیادہ صارفین کی شکایت موصول ہوئیں جبکہ گزشتہ روز رات 11 بجے بھی انسٹاگرام کی بندش کی خبریں موصول ہوئی تھیں۔

تاہم آج صبح کچھ دیر تک سروس ڈاؤن ہونے کے بعد دوبارہ بحال ہوگئی تاہم میٹا کی جانب سے کوئی بیان سامنے نہیں آیا۔

انسٹاگرام کی بندش پر سوشل میڈیا پلیٹ فارم ایکس پر صارفین کی جانب سے میمز کی بھرمار بھی شروع ہوگئی۔

صارفین نے ہیش ٹیگ انسٹاگرام ڈاؤن کا استعمال کرتے ہوئے ایکس پر لکھا کہ ’میں سمجھی کہ میرا اکاؤنٹ ہیک ہوگیا ہے۔‘

ایک اور صارف نے کہا کہ ’ہر کوئی یہ دیکھنے کے لیے ٹوئٹر پر لاگ اِن ہورہا ہے کہ آیا انسٹاگرام سروس ڈاؤن ہے۔

جب انسٹاگرام اکاؤنٹ خود بخود لاگ آؤٹ ہو جائے تو کیا کریں:

اپنی ڈیوائس کو ری اسٹارٹ کریں۔

انٹرنیٹ کنکشن چیک کریں۔

اگر آپ کے پاس اینڈرائیڈ ڈیوائس ہے تو cache کلیئر کریں ۔

انسٹاگرام ایپ کو اپ ڈیٹ کریں۔

کسی بھی تھرڈ پارٹی ایپس کو غیر فعال کریں۔

انسٹاگرام اَن انسٹال کریں اور دوبارہ انسٹال کریں۔