یورپی قانون ساز کا اسرائیل کو دہشتگرد قرار دینے کا مطالبہ

یورپی قانون ساز کا اسرائیل کو دہشتگرد قرار دینے کا مطالبہ

یورپی پارلیمنٹ کے سابق رکن میک والاس نے ایک بار پھر اسرائیلی مظالم پر شدید ردعمل کا اظہار کرتے ہوئے اسے دہشتگرد ریاست قرار دیا ہے اور یورپی یونین کی مجرمانہ خاموشی کو شرمناک قرار دیا ہے۔

آئرلینڈ سے تعلق رکھنے والے والاس نے پیر کے روز سوشل میڈیا پلیٹ فارم "ایکس” (سابقہ ٹوئٹر) پر لکھا:اسرائیل ایک دہشتگرد ریاست ہے جو فلسطینیوں کو کھانے کے حصول کے لیے قطار میں کھڑے ہونے کے دوران قتل کر رہا ہے اور یورپی یونین اس پر خاموش تماشائی بنی ہوئی ہے۔

والاس نے مزید کہا کہ اسرائیل "بے شرم، نادم نہ ہونے والا اور دھوکہ دہ” ہے، اور جس کسی نے بھی اب تک اس "شیطانی ریاست” کے ساتھ تعلقات برقرار رکھے ہیں، وہ جنگی جرائم میں اس کا شریک ہے۔

ان کا کہنا تھا:جو لوگ اسرائیل سے اب بھی تجارت کرتے ہیں، وہ درحقیقت نسل کشی کی حمایت کر رہے ہیں۔ یہ سب جنگی مجرم ہیں، تاریخ ان کے ساتھ نرم رویہ نہیں برتے گی۔

میک والاس نے ایک فلسطینی ماں اور اس کے کمسن بچے کی شہادت کی تصویر شیئر کرتے ہوئے لکھا:یہ اسرائیل کی ایک اور جنگی جنایت ہے، اور یورپی یونین کی اس جرم میں شراکت داری کا کھلا ثبوت۔

انہوں نے یورپی یونین کے رہنماؤں کو خبردار کرتے ہوئے کہا کہ ان کی خاموشی اور اسرائیل سے تجارتی تعلقات، انہیں نسل کشی کے جرم میں برابر کا شریک بنا رہے ہیں۔

ماضی میں بھی میک والاس اسرائیل کے خلاف متعدد بار سخت بیانات دے چکے ہیں۔