کینیڈا کا کیوبا کو امداد فراہم کرنے کا اعلان

سچ خبریں: جہاں کیوبا امریکہ کی جانب سے تیل کے وسائل کو روکنے کے اقدام کے بعد ایندھن کی شدید قلت سے دوچار ہے، وہیں کینیڈا نے پیر کے روز ہوانا کو امداد فراہم کرنے کے اپنے ارادے کا اعلان کیا ہے۔

واشنگٹن نے حالیہ ہفتوں میں اس جزیرے اور امریکہ کے دیرینہ دشمن کے خلاف دباؤ کی مہم تیز کر دی ہے۔

کینیڈا کی وزیر خارجہ انیتا آنند نے پیر کو بتایا کہ ہم مدد کے لیے ایک منصوبہ تیار کر رہے ہیں۔ انہوں نے یہ بات اس حوالے سے تفصیلات فراہم کئے بغیر کہ اس امداد میں کیا کچھ شامل ہوگا۔ ان کا کہنا تھا کہ اس وقت ہم اس اعلان کے بارے میں مزید تفصیلات فراہم کرنے کے لیے تیار نہیں ہیں۔

امریکی صدر ڈونلڈ ٹرمپ کی انتظامیہ کیوبا تک تمام تیل کی رسائی روکنے کے لیے اقدامات کر رہی ہے، بشمول وینزویلا کے تیل کے، جس کی وجہ سے اس جزیرے میں خوراک اور ٹرانسپورٹ کی قیمتوں میں اضافہ ہوا ہے اور ایندھن کی شدید قلت اور بجلی کی طویل بندش کا سامنا ہے۔

اقوام متحدہ نے خبردار کیا ہے کہ اگر کیوبا کی توانائی کی ضروریات پوری نہ ہوئیں تو یہ ایک انسانی بحران کا باعث بن سکتا ہے۔ کینیڈا نے گزشتہ ہفتے کہا تھا کہ وہ کیوبا کی صورتحال پر نظر رکھے ہوئے ہے اور وہاں بڑھتے ہوئے انسانی بحران کے خطرے پر فکر مند ہے۔

امریکہ، جو گزشتہ ماہ ایک مہلک حملے میں وینزویلا کے سابق صدر نکولس مادورو کو اغوا کرنے کی کوشش کے بعد اور زیادہ جری ہو گیا ہے، بار بار کیوبا کے خلاف کارروائی اور اس کی قیادت پر دباؤ ڈالنے کی بات کر چکا ہے۔

امریکہ اور کینیڈا کے درمیان ٹرمپ کے دور میں تجارتی محصولات، گرین لینڈ کے حوالے سے ٹرمپ کے بیانات، اوٹاوا کی بیجنگ سے تعلقات کو گرم کرنے کی کوشش اور کینیڈین وزیراعظم مارک کارنی کے اس بیان پر کہ درمیانی طاقتوں کو امریکی بالادستی کا شکار ہونے سے بچنے کے لیے مل کر کام کرنا چاہیے، جیسے معاملات پر بھی تناؤ رہا ہے۔