کیا چین امریکہ کے سامنے گھٹنے ٹیکے گا ؟

سچ خبریں: چین کے وزارت خارجہ نے آج منگل کو 29 اپریل کو اپنے سرکاری سوشل میڈیا اکاؤنٹس پر "ہم گھٹنے نہیں ٹیکینگے” کے عنوان سے ایک ویڈیو جاری کی۔ اس ویڈیو میں چینی اور انگریزی سب ٹائٹلز کے ساتھ زور دیا گیا ہے کہ امریکی بالادستی کے سامنے جھکنا شدید بحرانوں کو جنم دے گا۔

ویڈیو میں کہا گیا کہ امریکہ نہ صرف عالمی سطح پر ٹیرف کے طوفان برپا کر رہا ہے، بلکہ ’90 دنوں کی سزا’ جیسی پالیسیوں کے ذریعے مخصوص ممالک کو چین کے ساتھ اقتصادی تعاون محدود کرنے پر مجبور کر رہا ہے۔

یہ پالیسیاں ایک مہلک طوفان کی آنکھ کی مانند ہیں جو ظاہر میں پرسکون ہے، لیکن درحقیقت یہ دوسروں کے لیے ایک خطرناک جال ہے جو معاشی انتشار کو مزید بڑھا دے گا۔

وزارت خارجہ نے ویڈیو کے ایک اور حصے میں تاریخی واقعات کی طرف اشارہ کیا: کہ 1990 کی دہائی میں امریکہ نے سیمیکنڈکٹر ڈمپنگ کے بہانے جاپانی کمپنی ٹوشیبا سمیت دیگر کو کچلا، اور پلازا معاہدے کے ذریعے ین کی قیمت بڑھا کر جاپان کو طویل معاشی جمود میں دھکیل دیا۔

اسی طرح، امریکہ نے فرانسیسی کمپنی السٹوم پر دباؤ ڈال کر اسے توڑ دیا، جس سے فرانس اپنی ایک اہم صنعت سے محروم ہو گیا۔

ویڈیو کا پیغام واضح ہے کہ مصالحت کبھی بھی نجات کا راستہ نہیں ہوتی، اور گھٹنے ٹیکنے سے صرف بالادستی پسندوں کو مزید تقویت ملتی ہے۔

ویڈیو کے آخر میں موسیقی تیز ہوتی ہے اور ایک پرجوش آواز میں کہا جاتا ہے کہ چین گھٹنے نہیں ٹیکے گا، کیونکہ ہم جانتے ہیں کہ صرف جدوجہد ہی تعاون کا راستہ کھولتی ہے۔ اگر ہم مصالحت کی راہ اپنائیں، تو یہ تعاون بھی ختم ہو جائے گا۔

چین پیچھے نہیں ہٹے گا، کیونکہ اگر کمزور ممالک کی آواز سنی جائے، تو بالادستی پسندوں کی جبریت روکی جا سکتی ہے اور عالمی انصاف قائم رہے گا۔

ویڈیو میں امریکہ کی پالیسیوں پر تنقید کرتے ہوئے کہا گیا کہ امریکہ، جو عالمی تجارت میں پانچویں سے بھی کم حصہ رکھتا ہے، اپنے مفادات کے لیے اس کے قوانین کو بدلنے کی کوشش کر رہا ہے۔ حقیقت یہ ہے کہ امریکہ متحد دنیا میں ایک تنہا کشتی ہے جو لہروں کے درمیان بھٹک رہی ہے۔