ٹرمپ نے صدرِ کلمبیا کو منشیات مخالف مہم کا اگلا ہدف قرار دے دیا

?️ 12 دسمبر 2025

ٹرمپ نے صدرِ کلمبیا کو منشیات مخالف مہم کا اگلا ہدف قرار دے دیا

امریکی صدر ڈونلڈ ٹرمپ نے کلمبیا کے ساتھ بڑھتی ہوئی کشیدگی کے درمیان اعلان کیا ہے کہ کلمبیا کے صدر گوستاوو پیٹرو واشنگٹن کی منشیات مخالف کارزار کا اگلا ہدف ہوں گے۔ یہ بیان اس وقت سامنے آیا ہے جب امریکا نے کلمبیا کے ساتھ انسدادِ منشیات تعاون معطل کیا، پیٹرو کا ویزا منسوخ کیا اور مالی امداد میں کمی کردی۔

خبر رساں ادارے پولیٹیکو کے مطابق بدھ کے روز صحافیوں سے گفتگو میں ٹرمپ نے دعویٰ کیا کہ کلمبیا بڑی مقدار میں منشیات تیار کر رہا ہے۔ انہوں نے کہا کہ پیٹرو کو عقل مندی سے کام لینا چاہیے ورنہ وہ اگلا ہدف ہوں گے”۔ ابتدا میں ٹرمپ نے کہا کہ وہ پیٹرو کے بارے میں زیادہ نہیں سوچتے، مگر فوراً ہی اپنا لہجہ بدلتے ہوئے براہِ راست دھمکی دی۔

اس بیان سے قبل بھی ٹرمپ کلمبیا کے خلاف اپنی پالیسی سخت کر چکے ہیں۔ انہوں نے اسی ہفتے ایک انٹرویو میں کہا تھا کہ امریکا منشیات مخالف فوجی کارروائیوں کا دائرہ، جو پہلے ونزوئلا تک محدود تھا، اب مکزیکو اور کلمبیا تک بڑھا سکتا ہے۔ ٹرمپ نے ستمبر میں کارائیب اور بحرالکاہل میں منشیات بردار کشتیوں کے خلاف آپریشن کا حکم دیا تھا، اور ونزوئلا کے صدر نکولاس مادورو پر دباؤ بڑھانے کے لیے فوجی موجودگی میں اضافہ بھی کیا۔

امریکا اور کلمبیا کے تعلقات حالیہ مہینوں میں تیزی سے خراب ہوئے ہیں۔ واشنگٹن نے ستمبر میں کلمبیا کو منشیات کنٹرول کے پارٹنرز کی فہرست سے نکال دیا، صدر پیٹرو کا ویزا منسوخ کیا اور امداد کم کردی۔ اکتوبر میں امریکا نے پیٹرو پر یہ الزام بھی لگایا کہ وہ "غیر قانونی منشیات کے اسمگلر” ہیں۔

اگرچہ ٹرمپ کھل کر پیٹرو کی صدارت کے مخالف ہیں، لیکن کلمبیا میں آئینی طور پر مدت پوری ہونے کے بعد تبدیلیِ حکومت خود ہی ممکن ہے۔ اس ملک میں صدارتی انتخابات آئندہ مئی میں منعقد ہوں گے۔ابھی تک کلمبیا کی حکومت نے ٹرمپ کے تازہ بیانات پر کوئی ردّعمل نہیں دیا۔