ٹرمپ قطر پر اسرائیلی دہشتگردانہ حملےمین ملوث تھے:حماس

ٹرمپ قطر پر اسرائیلی دہشتگردانہ حملےمین ملوث تھے:حماس

 فلسطینی مزاحمتی تحریک حماس کے سینئر رہنما عبدالرحمن شدید نے الزام عائد کیا ہے کہ سابق امریکی صدر ڈونلڈ ٹرمپ نے اسرائیل کے حالیہ دہشت گرد حملے میں قطر کو نشانہ بنانے میں براہِ راست کردار ادا کیا۔ ان کے مطابق یہ حملہ حماس کی قیادت کے مذاکراتی عمل کو ناکام بنانے کی صہیونی کوشش تھی۔

عبدالرحمن شدید نے کہا کہ صہیونی افواج نے دوحہ میں موجود حماس کے وفد کو نشانہ بنایا، حالانکہ وفد غزہ میں جنگ بندی کی نئی امریکی تجویز کا جائزہ لے رہا تھا۔ ان کا کہنا تھا کہ یہ اقدام واضح کرتا ہے کہ اسرائیلی وزیر اعظم بنیامین نتنیاہو امن مذاکرات کو سبوتاژ کرنا چاہتے ہیں۔ انہوں نے اس کارروائی کو قطر کی خودمختاری، خلیجی ممالک اور مجموعی طور پر عرب ریاستوں کے خلاف کھلی جارحیت اور بین الاقوامی قوانین کی خلاف ورزی قرار دیا۔

انہوں نے عرب ممالک سے مطالبہ کیا کہ وہ اسرائیل کے خلاف سخت اور متحدہ مؤقف اپنائیں۔ عبدالرحمن شدید نے مزید کہا کہ ڈونلڈ ٹرمپ دو سال سے جاری غزہ میں نسل کشی اور فلسطینی عوام پر مسلسل حملوں کے اصل ذمہ دار ہیں اور حالیہ قطر حملے میں بھی شریک جرم ہیں۔

حماس رہنما نے یہ بھی واضح کیا کہ تنظیم کسی بھی ایسی سنجیدہ تجویز کو قبول کرنے کے لیے تیار ہے جو پانچ بنیادی نکات پر مبنی ہو: مستقل جنگ بندی، غزہ سے اسرائیلی فوجیوں کا انخلا، انسانی امداد کی فراہمی، قیدیوں کا تبادلہ اور غزہ کی تعمیر نو۔

حماس کے سیاسی دفتر کے رکن حسام بدران نے بھی اسرائیلی حملے کو شدید تنقید کا نشانہ بنایا اور کہا کہ یہ جنایت اس حقیقت کو ثابت کرتی ہے کہ اسرائیل کوئی معمولی ریاست نہیں بلکہ قاتل اور دہشت گرد گروہوں کا مجموعہ ہے جس کی بنیاد نسل پرستی اور انتہا پسندی پر ہے۔

انہوں نے کہا کہ اسرائیل خطے کے امن و استحکام کے لیے حقیقی خطرہ ہے، تاہم فلسطینی عوام اور حماس اپنے دفاع اور حقِ خودارادیت کی جدوجہد جاری رکھیں گے۔

حسام بدران کے مطابق فلسطینی تنظیموں، قومی شخصیات اور عوامی گروہوں نے حماس کے ساتھ بھرپور یکجہتی کا اظہار کیا ہے۔ ان کا کہنا تھا کہ حماس کی قیادت اپنے عوام کے خون کو مقدم جانتی ہے اور کسی بھی دباؤ کے باوجود قومی مؤقف اور مزاحمتی جدوجہد سے پیچھے نہیں ہٹے گی۔