وینزویلا کے خلاف کاروائی پر امریکہ کو چین کا انتباہ

?️ 28 نومبر 2025

وینزویلا کے خلاف کاروائی پر امریکہ کو چین کا انتباہ

چینی وزارتِ خارجہ کی ترجمان ماؤ نِنگ نے بیجنگ میں اپنے معمول کی پریس بریفنگ کے دوران کہا کہ چین ہر اس یکطرفہ پابندی اور بیرونی دباؤ کی مخالفت کرتا ہے جو اقوامِ متحدہ کی سلامتی کونسل کی منظوری کے بغیر عائد کیے جائیں۔

انہوں نے امریکا کی جانب سے وینزوئیلا پر تازہ پابندیوں پر تنقید کرتے ہوئے کہا کہ واشنگٹن کو چاہیے کہ وہ ان ’غیر قانونی اور یکطرفہ اقدامات‘ کو ختم کرے اور لاطینی امریکا اور کیریبین کے خطے میں امن، استحکام اور ترقی کے فروغ کے لیے سنجیدہ کوششیں کرے۔

ترجمان کے مطابق چین تمام فریقوں سے مطالبہ کرتا ہے کہ وہ وینزوئیلا کی خودمختاری کا احترام کریں اور ایسے اقدامات سے گریز کریں جو خطے میں تناؤ میں اضافہ کا باعث بنیں۔

امریکا نے 24 نومبر کو ’’کارٹیل دے لوس سولیس‘‘ نامی ایک مبینہ گروہ کو دہشت گرد تنظیم قرار دے کر اس پر پابندیاں عائد کی تھیں۔ واشنگٹن کا دعویٰ ہے کہ وینزوئیلا کے صدر نکولس مادورو اور اعلیٰ حکام اس گروہ کی سرپرستی کرتے ہیں، جبکہ وینزوئیلا حکومت نے اسے ’’احمقانہ جھوٹ‘‘ قرار دیتے ہوئے کہا کہ یہ اقدام ملکی معاملات میں مداخلت کا بہانہ ہے۔

ادھر امریکا نے منشیات کے خلاف کارروائی کے نام پر حالیہ مہینوں میں وینزوئیلا کی سرحدوں کے قریب اپنی فوجی موجودگی میں بھی اضافہ کیا ہے۔