نیتن یاہو کو نہیں معلوم جنگ ختم کیسے کی جائے:سابق اسرائیلی فوجی سربراہ

نیتن یاہو کو نہیں معلوم جنگ ختم کیسے کی جائے:سابق اسرائیلی فوجی سربراہ

اسرائیلی فوج کے سابق چیف آف اسٹاف گادی آیزنکوت نے کہا ہے کہ وزیراعظم بنیامین نیتن یاہو نہ صرف غزہ کی جنگ ختم نہیں کرنا چاہتے بلکہ انہیں یہ بھی نہیں معلوم کہ اس جنگ کو کیسے ختم کیا جائے، کیونکہ وہ مکمل فتح کے وہم میں مبتلا ہیں۔

الجزیرہ کے مطابق، آیزنکوت نے اعتراف کیا کہ نتن یاہو نے مذاکراتی عمل میں رکاوٹیں ڈالیں اور قیدیوں کی رہائی کے معاہدوں کو سبوتاژ کیا، جس کی وجہ سے زندہ اسیران آزاد نہ ہو سکے۔

انہوں نے پہلے بھی فوج کے غزہ شہر میں داخلے کو اسٹریٹجک حماقت قرار دیا تھا اور اب ایک بار پھر کہا ہے کہ غزہ میں زمینی آپریشن مسئلے کا فوری حل نہیں دے گا بلکہ فوج کو مزید مشکلات میں ڈالے گا۔

اسرائیلی میڈیا کے مطابق، غزہ پر زمینی یلغار کے لیے 70 ہزار فوجی تعینات کیے گئے ہیں اور یہ تعداد آئندہ دنوں میں مزید بڑھائی جا سکتی ہے۔ اس وقت دو بڑی بریگیڈز (162 اور 98) غزہ کے اطراف میں موجود ہیں جبکہ ایک اور بریگیڈ (36) کو بھی تعینات کرنے کی تیاری ہو رہی ہے تاکہ شہر کو مکمل محاصرے میں لیا جا سکے۔

یہ زمینی حملے فضائی بمباری کے ساتھ جاری ہیں جن میں اب تک بڑی تعداد میں بے گناہ فلسطینی شہید ہو چکے ہیں۔