نتن یاہو کی نئی چال، طوفان الاقصی میں ناکامی سے بچنے کے لیے تحقیقاتی قانون میں تبدیلی کی کوشش

نتن یاہو کی نئی چال، طوفان الاقصی میں ناکامی سے بچنے کے لیے تحقیقاتی قانون میں تبدیلی کی کوشش

اسرائیلی ذرائع ابلاغ نے انکشاف کیا ہے کہ اسرائیلی وزیرِ اعظم بنیامین نتن یاہو اپنے خلاف بڑھتے ہوئے دباؤ اور طوفان الاقصی آپریشن میں ناکامی کی ذمہ داری سے بچنے کے لیے تحقیقاتی کمیٹی کے قانون میں تبدیلی لانے کی کوشش کر رہے ہیں۔

لبنانی ویب سائٹ العہد کے مطابق، صہیونی اخبار یدیعوت آحارانوت نے رپورٹ دی ہے کہ نتن یاہو ایک قانونی ترمیم پر غور کر رہے ہیں جس کا مقصد تحقیقاتی کمیٹی کے اختیارات محدود کرنا ہے۔ موجودہ قانون کے تحت یہ کمیٹی کسی بھی حکومتی یا فوجی اہلکار کو ذاتی طور پر ذمہ دار ٹھہرا سکتی ہے، لیکن مجوزہ ترمیم کے بعد یہ اختیار صرف ادارہ جاتی سطح تک محدود ہو جائے گا۔

یعنی، نئی ترمیم کے تحت کمیٹی صرف اداروں یا سرکاری ڈھانچوں پر سفارشات دے سکے گی، مگر انفرادی سطح پر، خواہ وہ سیکیورٹی حکام ہوں یا سیاسی رہنما، کوئی کارروائی نہیں کر سکے گی۔

صہیونی مبصرین کا کہنا ہے کہ یہ اقدام نتن یاہو کی ذاتی پوزیشن بچانے اور انہیں "اکتوبر 7” حملے میں اسرائیلی ناکامی کی براہِ راست ذمہ داری سے محفوظ رکھنے کی ایک واضح کوشش ہے۔

یاد رہے کہ طوفان الاقصی آپریشن نے اسرائیلی انٹیلیجنس اور سیکیورٹی نظام کی ناکامی کو بے نقاب کر دیا تھا اور اس کے بعد سے تل ابیب میں سیاسی بحران اور عوامی احتجاجات شدت اختیار کر گئے ہیں۔