موساد کی خفیہ سازش بے نقاب؛ غزہ کے نوجوانوں کو جاسوسی کے جال میں پھانسنے کی کوشش

سچ خبریں:غزہ میں جاری انسانی بحران اور صہیونی جارحیت کے سائے میں اسرائیلی خفیہ ادارہ موساد ایک خطرناک اور مذموم منصوبے پر کام کر رہا ہے، جس کا مقصد قحط، بھوک اور محاصرے کا شکار فلسطینی نوجوانوں کو جھوٹے وعدوں کے ذریعے جاسوسی کے جال میں پھانسنا ہے۔

یہ بھی پڑھیں:یمنیوں کے سامنے صہیونیوں کی ناکامی؛ موساد کی مدد حاصل کرنے کی کوشش

 فلسطینی خبررساں ایجنسی شہاب کی رپورٹ کے مطابق، موساد نے غزہ سے محفوظ اخراج کی پیشکش کو جاسوسی کا ذریعہ بنا دیا ہے۔

تحقیقات کے مطابق، ایک مشکوک گروہ جو خود کو آویخای کی ٹیم کہتا ہے، ایک یہودی وکیل یورام یعودا کے نام پر غزہ کے رہائشیوں کو جھانسہ دے رہا ہے کہ وہ غزہ سے نکلنے میں ان کی مدد کر سکتا ہے۔

حالانکہ یہ وکیل صرف طلاق اور خاندانی معاملات کا ماہر ہے اور مہاجرین یا قانونی انخلا کے معاملات سے اس کا کوئی تعلق نہیں ، پھر بھی اس کا فون نمبر سوشل میڈیا پر گردش کر رہا ہے۔

فون پر بات کرنے والے افراد عربی زبان میں مہارت رکھتے ہیں اور ظاہر ہوتا ہے کہ وہ موساد کے افسران ہیں، جو رابطہ کرنے والوں سے شناختی معلومات، خاندان اور پڑوسیوں کے نام، محلّے کی تفصیلات مانگتے ہیں یہ سب واضح طور پر جاسوسی معلومات کے دائرے میں آتا ہے۔

فلسطینی مصنفہ بیسان محمود نبهت کے مطابق، غزہ کے بعض شہریوں کو ایس ایم ایس موصول ہو رہے ہیں جن میں کہا گیا ہے کہ وہ کسی اسرائیلی کیپٹن سے رابطہ کریں تاکہ نیتساریم کراسنگ کے ذریعے انہیں غزہ سے نکالا جا سکے، یہ سب ایک وسیع اسرائیلی پروپیگنڈے کا حصہ ہے جس کا مقصد غزہ کے نوجوانوں کو موساد کے جال میں پھنسانا ہے۔

حکومتِ غزہ نے ایک بیان میں اس منصوبے کو واضح طور پر صہیونی سازش قرار دیا ہے اور خبردار کیا ہے کہ یہ جھوٹی پیشکشیں فلسطینی عوام کی استقامت کو توڑنے اور قومی بیداری کو کمزور کرنے کے لیے کی جا رہی ہیں۔

یہ جعلی معلومات اور فون نمبرز موساد کے آلہ کار ہیں جن کے ذریعے جوانوں کو ایجنٹ بنانے، گرفتار کرانے یا قتل کرانے کی راہ ہموار کی جا رہی ہے۔

حکومت نے واضح کیا کہ بیرونِ ملک روانہ ہونے والے افراد میں صرف مریض اور زخمی شامل ہیں، جن کے لیے کرم ابو سالم کراسنگ سے باضابطہ انتظام کیا گیا ہے، جبکہ باقی تمام دعوے جھوٹ اور پروپیگنڈا ہیں۔

بیان کے آخر میں حکومتِ غزہ نے فلسطینی عوام سے اپیل کی ہے کہ وہ ان زہریلی مہمات سے ہوشیار رہیں، غزہ چھوڑنے کا جھوٹا خواب دکھا کر غدار بنانے کی صہیونی کوششیں دراصل ان کی شکست کا اعتراف ہے کہ وہ مزاحمتی قوت کو براہِ راست شکست دینے میں ناکام ہو چکے ہیں۔

مزید پڑھیں:بی بی سی کے مشرق وسطیٰ کا ڈائریکٹر موساد کا جاسوس نکلا

موساد کا یہ منصوبہ ایک دھوکہ ہے، جس کی قیمت ایجنٹی، گرفتاریاں، اذیتیں اور حتیٰ قتل ہو سکتی ہے۔