مقبوضہ قدس میں فلسطینیوں کے گھروں کی مسماری میں تیزی: ماہر ین کا سخت انتباہ

مقبوضہ قدس میں فلسطینیوں کے گھروں کی مسماری میں تیزی: ماہر ین کا سخت انتباہ

 امورِ قدس اور مسجدِ اقصیٰ کے ماہر عبداللہ معروف نے مقبوضہ مشرقی القدس کے علاقے سلوان، خصوصاً محلہ البستان میں فلسطینیوں کے گھروں کی مسماری کے عمل میں تیزی پر شدید تشویش کا اظہار کیا ہے۔

فلسطینی خبر رساں ادارے کے مطابق عبداللہ معروف نے کہا کہ اسرائیلی قابض حکام کی جانب سے محلہ البستان میں 14 فلسطینی گھروں کو مسمار کرنے کے نوٹس جاری کرنا ایک خطرناک پیش رفت ہے۔ ان کے مطابق یہ اقدام کسی وقتی فیصلے کا نتیجہ نہیں بلکہ القدس کی آبادی اور جغرافیائی شناخت کو تبدیل کرنے کی منظم پالیسی کا حصہ ہے۔

انہوں نے واضح کیا کہ قابض حکام کا مقصد پرانے شہرِ قدس اور بالخصوص مسجدِ اقصیٰ کے اطراف فلسطینی موجودگی کا خاتمہ کرنا ہے، تاکہ اسلامی اور مسیحی مقدس مقامات کو ان کے عرب و فلسطینی ماحول سے الگ کیا جا سکے۔

عبداللہ معروف کا کہنا تھا کہ اس وقت جو کچھ ہو رہا ہے وہ فلسطینی سماجی اور آبادیاتی حصار کو توڑنے کی ایک منظم کوشش ہے، جس کے ذریعے گھروں کی مسماری اور جبری بے دخلی کو ہتھیار کے طور پر استعمال کیا جا رہا ہے۔

انہوں نے مزید بتایا کہ حالیہ عرصے میں اسرائیلی کارروائیوں کی رفتار نمایاں طور پر بڑھ گئی ہے اور محلہ البستان میں جن گھروں کو مسماری کا خطرہ لاحق ہے، ان کی تعداد ان گھروں سے کہیں زیادہ ہے جو اب تک منہدم کیے جا چکے ہیں۔

ماہر امورِ قدس نے خبردار کیا کہ اسرائیل نئی مسماری کی لہروں کی تیاری کر رہا ہے، جن کا مقصد مقامی آبادی کو ناقابلِ برداشت حالات سے دوچار کرنا اور انہیں زبردستی نقل مکانی پر مجبور کرنا ہے۔

انہوں نے زور دیا کہ یہ اقدامات وسیع تر یہودی آبادکاری کے منصوبوں سے جڑے ہوئے ہیں، جن کا ہدف القدس کی فلسطینی شناخت کو مٹانا ہے۔

عبداللہ معروف نے عرب، اسلامی اور عالمی برادری سے فوری مداخلت کا مطالبہ کیا تاکہ گھروں کی مسماری اور جبری بے دخلی کو روکا جا سکے، اور سلوان کے ان رہائشیوں کو قانونی تحفظ فراہم کیا جا سکے جو اپنے گھروں اور زمینوں سے محرومی کے خطرے سے دوچار ہیں۔