مقبوضہ علاقوں میں امریکی سفیر کے متنازعہ موقف پر سعودی عرب کا شدید ردعمل

سچ خبریں:سعودی عرب کی وزارت خارجہ نے مقبوضہ فلسطین میں تعینات امریکی سفیر کے ان متنازعہ بیانات پر سخت ردعمل ظاہر کیا ہے جس میں انہوں نے مغربی کنارے اور مغربی ایشیا پر صہیونی حکومت کے تسلط کے حق کا اظہار کیا تھا۔

سعودی وزارت خارجہ کی جانب سے اس سلسلے میں جاری کردہ بیان میں کہا گیا ہے کہ ریاض (سعودی عرب) اسرائیل (مقبوضہ فلسطینی علاقوں) میں امریکی سفیر کے ان بیانات کی مذمت کرتا ہے، جس میں انہوں نے بے باکانہ کہا کہ پورے مشرق وسطیٰ پر اسرائیل کا کنٹرول قابل قبول ہوگا۔

سعودی وزارت خارجہ نے مزید کہا کہ اسرائیل (مقبوضہ فلسطینی علاقوں) میں امریکی سفیر کے یہ بیانات خطے کے ممالک اور امریکہ کے درمیان تعلقات کو نظر انداز کرتے ہیں۔ اسرائیل میں امریکی سفیر کا انتہا پسندانہ موقف انتہائی سنگین نتائج کا حامل ہے اور یہ خطے کے ممالک اور عوام کے خلاف عداوت کو بھڑکا کر عالمی امن و سلامتی کو خطرے میں ڈالتا ہے۔

واضح رہے کہ تل ابیب میں تعینات امریکی سفیر مائیک ہکابی نے قبل ازیں مشہور امریکی میزبان ٹکر کارلسن کے ساتھ ایک انٹرویو میں اس جعلی (صہیونی) حکومت کے علاقائی دعووں کے حوالے سے بے مثال گفتگو کی تھی۔

اس انٹرویو میں جب ہکابی سے سوال کیا گیا کہ کیا اسرائیل کو تورات کی تعلیمات کی بنیاد پر دریائے نیل سے دریائے فرات تک کے تمام علاقوں پر تسلط کا حق حاصل ہے؟ تو انہوں نے ایک مختصر اور متنازعہ جواب دیتے ہوئے کہا کہ اگر وہ (اسرائیل) یہ تمام علاقے حاصل کر لیتے ہیں، تو یہ ایک اچھی بات ہوگی!