فلسطین سے باہر نکلو ؛قطر ورلڈ کپ شائقین کا صیہونیوں کو پیغام

21 نومبر 2022

سچ خبریں:قطر میں ہونے والے ورلڈ کپ میں فٹبال کے تماشائیوں اور صیہونی صحافیوں کے درمیان تصادم ایک بار پھر سوشل نیٹ میڈیا کا موضوع بن گیا جہاں کچھ افراد نے دوحہ میں صیہونی حکومت کے ایک ٹیلی ویژن چینل کے رپورٹر کے سامنے "اسرائیلیو، نکل جاؤ” کے نعرے لگائے، جس سے ایک بار پھر ثابت ہوا کہ اس جعلی حکومت کی دنیا میں کوئی جگہ نہیں اور اس سلسلہ میں عرب اقوام اور دنیا کی آزاد قوموں میں کوئی فرق نہیں ہے۔

نیوز چینل اور میڈیا میں شائع ہونے والی ویڈیو فائل میں دکھایا گیا ہے کہ ایک صہیونی ٹی وی چینل کا رپورٹر صہیونی کیمروں کے سامنے ورلڈ کپ کی براہ راست رپورٹنگ کر رہا ہے کہ اسی دوران فلسطینیوں کے حامیوں کی ایک بڑی تعداد ہاتھوں میں فلسطین کا جھنڈا لیے اس کے اردگرد جمع ہوگئی اور اسرائیل فلسطین سے باہر نکلو کے نعرے لگائے۔

واضح رہے کہ گزشتہ روز لبنان کے ایک نوجوان نے صیہونی حکومت کے ایک نیوز چینل کے رپورٹر کو چیلنج کیا، سوشل میڈیا پر شائع ہونے والی ایک ویڈیو میں صیہونی حکومت کے چینل 12 کے رپورٹر نے انٹرویو کے آغاز میں ایک لبنانی نوجوان کو سلام کیا اور عربی میں گفتگو کرنا شروع کی،اسے توقع تھی کہ وہ اپنی صہیونی شناخت ظاہر کرے گا تو لبنانی صحافی گرمجوشی سے اس کا استقبال کرے گا۔

قابل ذکر ہے کہ اس لبنانی نوجوان نے جیسے ہی اسرائیل کا لفظ سنا تو انٹرویو روک دیا اور صہیونی رپورٹر کو بتایا کہ اسرائیل کا کوئی وجود نہیں ہے اور اس سرزمین کا نام فلسطین ہے۔

یاد رہے کہ گزشتہ چند برسوں کے دوران بعض عرب حکمرانوں نے صیہونی حکومت کے ساتھ سمجھوتہ کرنے کے معاہدے پر دستخط کیے اور تعلقات کو معمول پر لانا شروع کیا جس پر سیاست دانوں، مذہبی اور ثقافتی شخصیات، علاقائی اقوام اور دنیا کی آزادی پسند قوموں میں مذمت کی لہر دوڑ گئی۔

قابل ذکر ہے کہ عرب حکمرانوں کی جانب سے صیہونیوں کو گلے لگانے کے عمل کے باوجود ان ممالک کے عوام صیہونیوں کے ساتھ دوستی کو فلسطینی قوم کے ساتھ غداری سمجھتے ہیں اور اس قابض حکومت کے خلاف جدوجہد جاری رکھنے پر اصرار کرتے ہیں۔