غزہ دوبارہ تعمیر ہوگا، نیتن یاہو اپنے مقاصد میں ناکام رہا

غزہ دوبارہ تعمیر ہوگا،نیتن یاہو اپنے مقاصد میں ناکام رہا

 فلسطینی امور کے ماہر عادل شدید نے کہا ہے کہ اسرائیلی جارحیت کے باوجود غزہ ایک بار پھر تعمیر ہوگا، اور دشمن کی تباہ کن جنگی مشین جس نے ہر چیز کو ملبے کا ڈھیر بنا دیا، اپنے مقاصد حاصل کرنے میں ناکام رہی۔

خبر رساں ادارے شہاب کے مطابق، عادل شدید نے کہا کہ تمام اسرائیلی ماہرین، تجزیہ نگاروں اور سیاسی رہنماؤں نے تسلیم کیا ہے کہ نیتن یاہو کے “مکمل فتح” کے نعروں اور جلد کامیابی کے دعووں کو سخت ناکامی کا سامنا کرنا پڑا۔انہوں نے کہا کہ اسرائیل نے بے پناہ قتل و غارت، نسل کشی اور تباہی کے باوجود اپنے کسی بھی اسٹریٹیجک ہدف کو حاصل نہیں کیا۔

عادل شدید کے مطابق، اسرائیلی افواج نے غزہ میں بڑے پیمانے پر تباہی مچائی — اسپتالوں، تعلیمی اداروں، جامعات، لیبارٹریوں، مساجد اور بنیادی ڈھانچے کو مٹا دیا گیا۔ ان کے بقول، مقصد یہ تھا کہ زندگی کی تمام علامتیں ختم کر دی جائیں اور اہلِ غزہ کو جبری طور پر ہجرت پر مجبور کیا جائے تاکہ واپسی کی صورت میں ان کے لیے کوئی قابلِ رہائش جگہ باقی نہ رہے۔

انہوں نے کہا کہ فلسطینی عوام نے ناقابلِ بیان قربانیاں دی ہیں، مگر اسرائیل اب خود اعتراف کر رہا ہے کہ وہ اپنے مقاصد حاصل کرنے میں ناکام رہا۔

عادل شدید نے پُرعزم لہجے میں کہا کہ غزہ ایک بار پھر سے آباد ہوگا، اور دشمن کی جنگی مشین جس نے جو کچھ بھی تباہ کیا ہے، وہ سب دوبارہ تعمیر کیا جائے گا۔

دریں اثناء، ایرنا کے مطابق، حماس اور اسرائیل کے درمیان جنگ بندی کا پہلا مرحلہ جمعہ کو دوپہر ۱۲ بجے (وقتِ قدس) نافذالعمل ہوا، جس کی منظوری اسرائیلی کابینہ نے اسی روز صبح دی تھی۔

اس سے قبل فلسطینی وزارتِ صحت کے ڈائریکٹر جنرل منیر البرش نے بتایا تھا کہ غزہ کی ۳۸ اسپتالیں مکمل طور پر تباہ ہو چکی ہیں، اور صرف ۱۲ اسپتال کسی حد تک خدمات انجام دے رہے ہیں۔

شفا میڈیکل کمپلیکس کے سربراہ محمد ابو سلمیہ نے کہا ہے کہ ۸ لاکھ سے زائد بے گھر افراد شمالی غزہ واپس لوٹنے کی تیاری کر رہے ہیں، تاہم صحت کا نظام مکمل طور پر تباہ ہو چکا ہے اور بنیادی سہولیات ناپید ہیں۔