عراقی ہیکرز کے ہاتھوں صیہونی لگاتار سائبر حملوں کا شکار

🗓️ 22 اپریل 2022

سچ خبریں:عراق سے مسلسل دو روز تک صیہونی حکومت کی ویب سائٹس اور سرورز کو سائبر حملوں کا نشانہ بنایا گیا ہے۔
عراقی صابرین نیوز ٹیلیگرام چینل کی رپورٹ کے مطابق لگاتار دو دن، تک صیہونی حکومت کی ویب سائٹس اور سرورز کو بڑے پیمانے پر عراقی سائبر حملوں کا نشانہ بنایا گیا ہے ، رپورٹ کے مطابق ہیکرز نے تل ابیب کے بنگورین ایئرپورٹ کی ویب سائٹ اور سرورز پر حملہ کیا۔

اسی دوران نیو پریس ویب سائٹ نے عبرانی ذرائع کے حوالے سے بتایا کہ عراقی ہیکرز کے سائبر حملے نے بینک آف اسرائیل کی ویب سائٹ اور بین گوریون ایئرپورٹ کی ویب سائٹ کو صارفین کی پہنچ سے باہر کر دیا ہے، یاد رہے کہ یہ حملہ اس وقت ہوا جبکہ صابرین نیوز ٹیلی گرام چینل نے اطلاع دی کہ "الطائرہ” نامی گروہ نے صیہونی حکومت کے چینل 9 کے انفارمیشن بیس سمیت اس حکومت کے ٹھکانوں اور سرورز کو نشانہ بنایا ہے۔

صابرین نیوز کا کہنا ہے کہ سائبر حملہ ٹھیک اسی وقت ہوا جب عراقی سرزمین پر سردار سلیمانی اور ابو مہدی المہندس کو شہید کیا گیا، قابل ذکرہے کہ اس کے چند گھنٹوں بعد صیہونی حکومت کے 9ویں ٹیلی ویژن چینل کی نیوز سائٹ نے اعتراف کیا کہ اسے سائبر حملے کا نشانہ بنایا گیا ہے اور اس کی ویب سائٹ کو درہم برہم کرکے اسے ناقابل رسائی بنا دیا گیا ہے۔