طالبان کی ہندوستان کو کابل میں پھر سے اپنا سفارتخانہ کھولنے کی پیشکش

?️ 29 مئی 2022

سچ خبریں:طالبان کے سیاسی دفتر کے ترجمان نے ہندوستان سے کابل میں اپنا سفارتخانہ دوبارہ کھولنے کی پیشکش کرتے ہوئے کہا کہ اگر ہندوستان اپنا سفارتخانہ کھولنے کے لیے تیار ہو تو ان کے سفارتخانہ اور سفارتکاروں کو مکمل سکیورٹی فراہم کی جائے گی۔
افغان ذرائع ابلاغ کی رپورٹ کے مطابق افغانستان میں طالبان کی عبوری حکومت نے ہندوستان کو کابل میں دوبارہ سفارتخانہ کھولنے کی پیشکش کی ہے،اطلاعات کے مطابق قطرمیں طالبان کے سیاسی دفترکے ترجمان سہیل شاہین نے ایک انٹرویو میں کہا کہ اگر ہندوستان کابل میں دوبارہ سفارتخانے کھولے گا تو اس کے سفارتکاروں کومکمل سکیورٹی فراہم کی جائے گی، انہوں نے کہا کہ ہندوستان کو قومی اور باہمی مفادات کے بنیاد پر طالبان حکومت سے تعلقات قائم کرنا چاہئیں اورسابق افغان حکام سے روابط نہیں رکھنے چاہئیں۔

سہیل شاہین کا کہنا تھا کہ افغانستان میں کام کرنے والے تمام غیرملکی سفارتکاروں کو مکمل تحفظ فراہم کرنا حکومت کی ذمہ داری ہے،بہت سے سفارت خانے کابل میں کام کررہے ہیں اور انہیں بھرپورسکیورٹی دی گئی ہے، ہندوستان سفارت خانے اورسفارتکاروں کو بھی سکیورٹی فراہم کی جائے گی۔

سہیل شاہین نے کہا کہ اگر بھارت افغانستان میں جاری منصوبے مکمل کرنا چاہے گا یا نئے منصوبے شروع کرنا چاہے گا تو ہم اس کا خیرمقدم کریں گے۔