صہیونی غزہ میں خطرناک نسل کشی کی طرف بڑھ رہے ہیں

?️ 9 دسمبر 2025

صہیونی غزہ میں خطرناک نسل کشی کی طرف بڑھ رہے ہیں

فلسطین کے لیے قائم کیے گئے عوامی بین الاقوامی ٹریبونل کے تاریخی فیصلے کے بعد، ایک ممتاز ماہرِ فوجداری و انسانی حقوق، ڈاکٹر عمر نشّابہ نے انکشاف کیا ہے کہ اسرائیل غزہ میں نہ صرف نسل کشی بلکہ ماحولیات کی تباہی کے سنگین جرم، جسے اکوسائیڈ کہا جاتا ہے، کا بھی ارتکاب کر رہا ہے۔

ڈاکٹر نشّابہ نے کہا کہ اسرائیل کی حکمتِ عملی کا مقصد صرف انسانی جانوں کا ضیاع نہیں بلکہ غزہ کے قدرتی ماحول کو اس حد تک تباہ کرنا ہے کہ وہاں دوبارہ زندگی اور آبادکاری ممکن نہ رہے۔ انہوں نے اس عمل کو “میٹا سائیڈ” سے تعبیر کیا، یعنی ایسی مکمل تباہی جس میں فطرت اور انسانی زندگی کے تمام آثار مٹا دیے جائیں۔

عدالت کے سامنے پیش کی گئی رپورٹس اور سیٹلائٹ تصاویر کے مطابق غزہ میں درختوں، زرعی زمینوں، پانی کے ذخائر اور فاضلابی نظام کی بڑے پیمانے پر تباہی ہوئی ہے، جس سے ہوا، پانی اور مٹی شدید آلودہ ہو چکی ہے۔ رپورٹس کے مطابق اسرائیل نے غزہ میں 180 ہزار ٹن سے زائد اسلحہ استعمال کیا، جس سے علاقے کو ناقابلِ رہائش بنانے کی کوشش کی گئی۔

ڈاکٹر نشّابہ نے یہ بھی الزام لگایا کہ اسرائیل کو امریکہ اور بعض یورپی ممالک کی سیاسی، مالی اور فوجی حمایت حاصل ہے، جس کی وجہ سے اسے عالمی سطح پر جوابدہی کا سامنا نہیں کرنا پڑ رہا۔ انہوں نے اقوام متحدہ کی خصوصی رپورٹَر فرانچسکا آلبانیزے کی رپورٹس کا حوالہ دیا، جن میں کثیر القومی کمپنیوں اور درجنوں ممالک کے اسرائیل سے تعاون کو بے نقاب کیا گیا ہے۔

انہوں نے فلسطینی اور لبنانی شہریوں کی جبری گمشدگیوں، گرفتاریوں اور انسانی حقوق کی سنگین خلاف ورزیوں پر بھی تشویش کا اظہار کیا اور عالمی برادری سے مطالبہ کیا کہ اسرائیل اور اس کے حامی ممالک کو ان جرائم پر جوابدہ ٹھہرایا جائے۔

عوامی ٹریبونل کے مطابق، غزہ میں جاری کارروائیاں محض فوجی کاروائیاں نہیں بلکہ منظم نسل کشی اور ماحولیاتی تباہی کی ایک واضح مثال ہیں، جن پر بین الاقوامی سطح پر فوری کارروائی ناگزیر ہے۔