خصوصی اتحاد کی پوشیدہ قیمت

?️ 4 جنوری 2026

خصوصی اتحاد کی پوشیدہ قیمت

غزہ جنگ نے واضح کر دیا ہے کہ امریکا اور اسرائیل کے درمیان قائم خصوصی اتحاد‘ نہ تو دیرپا سلامتی کا ضامن بن سکا ہے اور نہ ہی خطے میں استحکام لا سکا ہے، بلکہ اس کے نتیجے میں اسرائیل کے اندر جمہوری اقدار کمزور، فلسطینی عوام پر دباؤ میں اضافہ اور امریکا کی عالمی ساکھ کو نقصان پہنچا ہے۔

امریکی جریدے فارن افرز نے اپنی تفصیلی رپورٹ میں لکھا ہے کہ غزہ میں دو سالہ جنگ کے دوران انسانی بحران سنگین صورت اختیار کر چکا ہے۔ بین الاقوامی اداروں کے مطابق، غزہ کی 90 فیصد آبادی بے گھر ہو چکی ہے، لاکھوں افراد قحط اور شدید غذائی قلت کا سامنا کر رہے ہیں اور بیشتر رہائشی عمارتیں تباہ یا شدید متاثر ہوئی ہیں۔

رپورٹ کے مطابق اگرچہ اسرائیل نے حماس اور حزب اللہ کی عسکری صلاحیتوں کو نقصان پہنچایا ہے، لیکن ان فوجی کامیابیوں کے ساتھ سنگین سیاسی اور اخلاقی قیمت بھی ادا کی گئی ہے۔ اسرائیل اس جنگ کے بعد عالمی سطح پر تنہائی کا شکار ہو رہا ہے، کئی یورپی ممالک نے اسلحے کی فراہمی محدود کر دی ہے، جبکہ امریکا میں بھی اسرائیل کے لیے غیر مشروط حمایت پر عوامی مخالفت بڑھ رہی ہے۔

فارن افرز کا کہنا ہے کہ اسرائیل کی عسکری برتری وقتی ثابت ہو سکتی ہے، کیونکہ فلسطینیوں کے لیے کوئی مؤثر سیاسی نظام قائم نہ ہونے کی صورت میں خطہ مزید عدم استحکام کا شکار رہے گا۔ اسی طرح اسرائیل کے اندر عدالتی اصلاحات، آبادکاری کی توسیع اور سماجی تقسیم جمہوری بنیادوں کو کمزور کر رہی ہے، جنہیں امریکی حمایت نے بالواسطہ تقویت دی ہے۔

رپورٹ میں اس امر پر بھی زور دیا گیا ہے کہ اس خصوصی اتحاد کی قیمت امریکا کو بھی ادا کرنی پڑ رہی ہے۔ واشنگٹن کی عالمی ساکھ متاثر ہوئی ہے، اس کی توجہ دیگر اہم خطوں خصوصاً ہند-بحرالکاہل سے ہٹ رہی ہے، جبکہ اندرونِ ملک سیاسی تقسیم اور نفرت انگیزی میں اضافہ ہو رہا ہے۔

فارن افرز کے مطابق اب وقت آ گیا ہے کہ امریکا اسرائیل کے ساتھ اپنے تعلقات کو ’’خصوصی‘‘ کے بجائے معمول کے سفارتی اصولوں کے تحت استوار کرے۔ رپورٹ سفارش کرتی ہے کہ امریکی امداد کو انسانی حقوق، قانون کی پاسداری اور فلسطینیوں کے حقِ خودارادیت سے مشروط کیا جائے تاکہ ایک زیادہ متوازن، ذمہ دار اور پائیدار پالیسی اپنائی جا سکے۔