حزب اللہ کو بھی دیگر سیاسی جماعتوں کی طرح کام کرنے کا حق ہے: لبنانی وزیر اعظم

?️ 28 دسمبر 2021

سچ خبریں:لبنانی وزیر اعظم نجیب میقاتی نے یہ کہتے ہوئے کہ لبنان پر کسی بیرونی ملک کا تسلط نہیں ہے، زوردیا کہ حزب اللہ لبنان میں کسی بھی دوسری سیاسی جماعت کی طرح کام کر سکتی ہے۔
النشرہ نیوز ویب سائٹ کی رپورٹ کے مطابق لبنانی وزیر اعظم نجیب میقاتی نے آج ایک پریس کانفرانس سے خطاب کرتے ہوئے اس ملک پربیرونی دباؤکے سلسلہ میں ردعمل ظاہر کرتے ہوئے کہا کہ لبنان پر کسی بیرونی ملک کا تسلط نہیں ہے، انہوں نے مزید کہا کہ حزب اللہ لبنان کی دیگر جماعتوں کی طرح ایک سیاسی جماعت ہے۔

لبنان کے وزیر اعظم نجیب میقاتی نے آج (منگل کو) وزیر اعظم ہاؤس میں ہونے والی پریس کانفرنس میں کہا کہ لبنان کو بہت سے سنگین مسائل اور خطرات کا سامنا ہے جنہیں حل کرنے کے لیے ایک دوسرے کی مددکرنےاور ایک ساتھ کھڑے ہونے کے علاوہ کوئی دوسرا راستہ نہیں ہے۔

رپورٹ کے مطابق میقاتی نے کہا کہ اگر ان کا استعفیٰ لبنان کے حق میں ہوتا تو وہ ایسا کرتے لیکن موجودہ حالات میں اس سے صورتحال مزید پیچیدہ ہو جائے گی ، ان کے بقول حکومت نے 12 اکتوبر کے بعد سے کابینہ کا کوئی اجلاس نہیں کیا اور اس معاملے نے حکومت کی کارکردگی کو بنیادی طور پر متاثر کیا ہے جبکہ دوسری طرف وہ اس کے لیے کسی کو ذمہ دار نہیں ٹھہرا سکتے اور ساتھ ہی ساتھ کابینہ کے اجلاس دوبارہ شروع کرنے کے لیے اپنی مشاورت بھی جاری رکھے ہوئے ہیں۔

اپنی تقریر کے ایک اور حصے میں نجیب میقاتی نے دوسرے ممالک کے دباؤ کا ذکر کیے بغیر حزب اللہ کا حوالہ دیا اور کہا کہ حزب اللہ لبنان میں کسی بھی دوسری سیاسی جماعت کی طرح کام کر سکتی ہے، انہوں نے زور دے کر کہا کہ وہ اس بات کو قبول نہیں کرتے کہ لبنان دوسرے ممالک کے کنٹرول میں ہے۔