انٹرپول کے اماراتی سربراہ کے خلاف تشدد کے الزام میں شکایت

?️ 19 جنوری 2022

سچ خبریں:ایک وکیل نے متحدہ عرب امارات کےانٹرپول کے نئے سربراہ کے خلاف تشدد کے الزام میں مقدمہ دائر کر دیا ہے۔
رشیا ٹوڈے کی ویب سائٹ کے مطابق متحدہ عرب امارات میں انسانی حقوق کے محافظ اور بلاگر احمد منصور کے وکیل ولیم بورڈن نے کہا کہ انھوں نے پیرس کی ایک عدالت میں انٹرپول کے نئے اماراتی سربراہ احمد ناصر الریسی کے خلاف مقدمہ دائر کیا ہے، الریسی پر مقدمے میں تشدد کا الزام عائد کیا گیا ہے۔

یادرہے کہ یہ شکایت اسی وقت درج کی گئی جب الریسی فرانس کے شہر لیون میں انٹرپول ہیڈ کوارٹر پہنچے، واضح رہے کہ احمد منصور نے الریسی کو انٹرپول کا سربراہ بنائے جانے سے پہلے بھی ان کے خلاف مقدمہ دائر کیا تھا۔

قابل ذکر ہے کہ متحدہ عرب امارات کے انسانی حقوق کے کارکن احمد منصور کو 2017 میں گرفتار کیا گیا جس کے اگلے سال انھیں 10 سال قید کی سزا سنائی گئی ، اماراتی حکام کے مطابق انھوں نے متحدہ عرب امارات کی حکومت پر تنقید کی اور سوشل میڈیا پر اپنے ملک کی تصویر کو داغدار کیا۔

واضح رہے کہ انسانی حقوق کے اس کارکن کو بین الاقوامی معیارات اور قانون کی خلاف ورزی کرتے ہوئے 20 مارچ 2017 سے الصدر جیل میں قید تنہائی میں رکھا گیا ہے اور فارس گلف سینٹر فار ہیومن رائٹس کے مطابق احمد منصور پر تشدد کرنے میں جنرل احمد ناصر الریسی کا کردار ثابت ہو چکا ہے۔