امریکہ کی منافقت؛ واشنگٹن کا ایک معاہدے پر افسوس کا اظہار 

سچ خبریں:جہاں امریکہ کی رکاوٹوں کے باعث جوہری ہتھیاروں کے پھیلاؤ سے بچاؤ کے معاہدے (این پی ٹی) کے جائزہ اجلاس کو حتمی دستاویز پر اتفاق رائے حاصل نہ ہو سکا، وہیں امریکی محکمہ خارجہ نے اس معاہدے کے رکن ممالک کے درمیان عدم توافق پر افسوس کا اظہار کیا ہے۔

امریکی محکمہ خارجہ نے جمعرات کو کہا کہ ہمیں اس بات پر افسوس ہے کہ این پی ٹی کے رکن ممالک حتمی دستاویز پر متفق نہ ہو سکے۔ امریکی وزارت خارجہ نے اسرائیلی حکومت کے جوہری خطرے کا کوئی ذکر کیے بغیر ایران پر عدم پابندی کا الزام عائد کیا اور اجلاس میں معاہدے میں ناکامی پر مایوسی کا اظہار کیا۔

واضح رہے کہ نیویارک میں اقوام متحدہ کے ہیڈکوارٹر میں ویت نام کے مستقل مندوب کی زیر صدارت جوہری ہتھیاروں کے پھیلاؤ سے بچاؤ کے معاہدے (این پی ٹی) کا 11واں جائزہ اجلاس ایک ماہ تک جاری رہا، لیکن امریکہ کی تخریبی کارروائیوں کے باعث یہ حتمی دستاویز طے کرنے میں ناکام رہا۔

اسلامی جمہوریہ ایران نے میناب کے شہید طلبہ اور ڈینا جنگی جہاز کے شہداء میں سے چند کے نام سے مزین ایک بیان میں، جن کا خون امریکہ اور اسرائیلی حکومت کی جارحیت کے باعث ناحق بہایا گیا، واشنگٹن، لندن اور پیرس کے نقصان دہ موقف، ایران کے پرامن جوہری پروگرام کے حوالے سے مغرب کی دوہری پالیسیوں، اور اسرائیلی حکومت کے جوہری ذخیرے پر آنکھیں بند کرنے کی شدید مذمت کی۔

بیان میں کہا گیا کہ بدقسمتی سے، جارح اسرائیلی حکومت کو سزا دینے کے بجائے، جس نے اقوام متحدہ کی متعدد قراردادوں کو نظر انداز کرتے ہوئے این پی ٹی میں شامل ہونے اور ایجنسی کے معائنے سے انکار کر دیا ہے، بہت سی مغربی حکومتیں اسرائیل کی حمایت میں کوئی کسر اٹھا نہیں رکھتیں۔ ایران کے جوہری تنصیبات پر غیرقانونی حملے مغربی ممالک بالخصوص امریکہ کی دوہری، جانبدارانہ اور مسترد شدہ پالیسیوں کو بے نقاب کرنے کا ایک حقیقی امتحان ہیں۔