اسلام آباد اور کابل مذاکرات کا دوسرا دور،پاکستان نے طالبان کو دہشت گردی کے خلاف جامع منصوبہ پیش کر دیا

اسلام آباد اور کابل مذاکرات کا دوسرا دور،پاکستان نے طالبان کو دہشت گردی کے خلاف جامع منصوبہ پیش کر دیا

پاکستان اور افغانستان کے درمیان دوسرے دور کے مذاکرات ترکی کے شہر استنبول میں جاری ہیں، جہاں پاکستانی وفد نے طالبان حکام کو سرحد پار دہشت گردی کی روک تھام کے لیے ایک جامع منصوبہ پیش کیا ہے۔

پاکستانی ذرائع ابلاغ کے مطابق، مذاکرات کا یہ سلسلہ جو ہفتے کے روز شروع ہوا تھا، اب دوسرے دن میں داخل ہو چکا ہے اور دونوں فریقوں نے اپنے اپنے تجاویز اور مطالبات کا تبادلہ کیا ہے۔

رپورٹس کے مطابق، ترکی اور قطر کے نمائندے بھی ان مذاکرات میں بطور ضامن اور ثالث شریک ہیں، اور امکان ظاہر کیا جا رہا ہے کہ بات چیت تیسرے دن تک بھی جاری رہے گی۔

پاکستانی نیوز چینل جیو نیوز نے رپورٹ کیا ہے کہ اسلام آباد کی جانب سے طالبان وفد کو ایک جامع منصوبہ پیش کیا گیا ہے، جس کا مقصد افغان سرزمین سے پاکستان میں سرگرم دہشت گرد گروہوں کی نقل و حرکت روکنا ہے۔ دوسری جانب طالبان وفد نے بھی اپنی مطالبات کی فہرست پاکستانی وفد کے حوالے کی ہے۔

ذرائع کا کہنا ہے کہ آج دوپہر بعد ایک اہم فیصلہ کن نشست منعقد ہوگی جس میں ثالث ممالک کی موجودگی میں حتمی معاہدے تک پہنچنے کی کوشش کی جائے گی۔

افغانستان کے وفد کی تجویز میں اس بات پر زور دیا گیا ہے کہ پاکستان کو افغان فضائی و زمینی حدود کی خلاف ورزیوں سے گریز کرنا چاہیے اور اپنی سرزمین کو طالبان مخالف گروہوں کے لیے استعمال ہونے سے روکنا ہوگا۔

دوسری جانب، اسلام آباد کا مؤقف ہے کہ مذاکرات کا بنیادی ہدف یہ ہے کہ کابل حکومت تحریک طالبان پاکستان (TTP) اور دیگر سرحد پار دہشت گرد گروہوں کو مؤثر طور پر قابو میں لائے۔

یاد رہے کہ پاکستان اور طالبان حکومت کے درمیان پہلا دور مذاکرات ۱۸ اکتوبر کو دوحہ میں ترکی اور قطر کی ثالثی میں ہوا تھا، جس میں فریقین نے فوری جنگ بندی اور پائیدار امن کے لیے مشترکہ لائحہ عمل پر اتفاق کیا تھا۔

اب استنبول میں جاری یہ دوسرا دور، دونوں ممالک کے تعلقات کو دوبارہ معمول پر لانے اور دہشت گردی کے بڑھتے خطرے کو قابو کرنے کے لیے ایک اہم موقع سمجھا جا رہا ہے۔