اسرائیل یمنی میزائلوں کے بارے میں تحقیق کر رہا ہے

اسرائیل یمنی میزائلوں کے بارے میں تحقیق کر رہا ہے

صہیونی ویب سائٹ والا کے مطابق، ابتدائی تجزیات سے شبہ ہے کہ یمن نے پہلی مرتبہ ایسے بیلسٹک میزائل کا استعمال کیا ہے جو ٹارگٹ سے پہلے تین الگ الگ وارہیڈز میں تقسیم ہو جاتا ہے۔ اس خصوصیت کے باعث اس کا انٹرسیپٹ کرنا انتہائی مشکل ہو جاتا ہے۔

تحقیقات جاری ہیں اور ماہرین میزائل کے فلائٹ روٹ اور تباہی کے ملبے کا تجزیہ کر رہے ہیں۔ صہیونی سکیورٹی اداروں کا ماننا ہے کہ اگر یہ ثابت ہو جائے کہ یمن نے واقعی کلسٹر وارہیڈ استعمال کیا ہے تو اسرائیل کو اپنی موجودہ میزائل ڈیفنس حکمتِ عملی پر نظرِ ثانی کرنا ہوگی۔

رپورٹ کے مطابق، میزائل میں ممکنہ طور پر 10 چھوٹے دھماکہ خیز وارہیڈز نصب تھے۔ اس کے ساتھ ہی اسرائیلی فوجی انٹیلی جنس اور موساد کو یمن میں حساس اہداف جیسے فوجی انفراسٹرکچر، انٹیلی جنس مراکز، بندرگاہیں اور دفاعی صنعتوں کے بارے میں معلومات اکٹھی کرنے کا حکم دیا گیا ہے تاکہ بوقت ضرورت ان پر حملہ کیا جا سکے۔

گزشتہ جمعہ یمنی مسلح افواج کے ترجمان بریگیڈیئر یحییٰ سریع نے اعلان کیا تھا کہ یمن نے ایک جدید بیلسٹک میزائل "فلسطین 2” اسرائیل کے بن گوریون ایئرپورٹ (اللّد) کی جانب داغا ہے۔

اسرائیلی ذرائع ابلاغ نے تصدیق کی ہے کہ میزائل کا کچھ ملبہ صہیونی بستی گینتون کے ایک مکان پر بھی گرا۔ اس واقعے کے بعد اسرائیلی فوج اس ناکامی اور میزائل کو روکنے میں اپنی ناکامی کا جائزہ لے رہی ہے۔

بریگیڈیئر یحییٰ سریع نے ایک بار پھر واضح کیا کہ جب تک غزہ پر حملے اور محاصرہ ختم نہیں ہوتا، یمن فلسطینی عوام کی حمایت جاری رکھے گا۔ انہوں نے کہا کہ یمن کسی دباؤ میں نہیں آئے گا اور دشمن کو اپنے جرائم کی بھاری قیمت ادا کرنا پڑے گی، جس سے یمنی مزاحمت مزید مضبوط ہوگی۔