اسرائیل کے ساتھ تعلقات بحال کرنا جرم ہے؛مقتدی صدر

اسرائیل کے ساتھ تعلقات بحال کرنا جرم ہے؛مقتدی صدر

عراق میں اسرائیل سے تعلقات معمول پر لانے کے معاملے پر سیاسی اور مذہبی حلقوں میں شدید ردعمل سامنے آیا ہے، جہاں مقتدیٰ صدر نے واضح طور پر اعلان کیا ہے کہ اسرائیل کے ساتھ عادی سازی عراقی قانون کے تحت جرم ہے اور اس کی کوئی گنجائش نہیں۔

میڈیا رپورٹس کے مطابق، یہ ردعمل اس وقت سامنے آیا جب عراقی کیتھولک کلیسا کے رہنما لوئیس رافائل ساکو نے بغداد میں حضرت عیسیٰؑ کی ولادت کی مناسبت سے منعقدہ تقریب کے دوران، وزیر اعظم محمد شیاع السودانی کی موجودگی میں اسرائیل کے ساتھ تعلقات کی عادی سازی کی خواہش کا اظہار کیا۔ انہوں نے کہا تھا کہ عراق انبیاء کی سرزمین ہے اور دنیا کو عراق کی طرف دیکھنا چاہیے۔

ان بیانات پر مقتدیٰ صدر نے سخت موقف اختیار کرتے ہوئے کہا کہ اسرائیل کے ساتھ تعلقات کی عادی سازی ایک ایسا جرم ہے جس پر عراقی قانون میں سزا مقرر ہے۔ انہوں نے متعلقہ حکام اور اداروں سے مطالبہ کیا کہ وہ اسرائیل سے تعلقات معمول پر لانے کی کسی بھی کوشش کے خلاف فوری طور پر اپنی قانونی ذمہ داریاں ادا کریں۔ ان کا کہنا تھا کہ عراق میں عادی سازی اور اسے جائز قرار دینے کی کوئی جگہ نہیں۔

عراق کے وزیرِ مہاجرین، ایفان فائق جابرو، نے بھی ان بیانات کو مسترد کرتے ہوئے کہا کہ اسرائیل سے تعلقات کی حمایت یا اس کا جواز پیش کرنا عراقی عوام کے موقف کی عکاسی نہیں کرتا۔ انہوں نے واضح کیا کہ یہ خیالات عراق کے مذہبی اور قومی طبقات کی حقیقی خواہشات کے خلاف ہیں۔

جابرو نے اپنی فیس بک پوسٹ میں لکھا کہ عراقی حکومت اور عوام فلسطینی کاز کی حمایت پر ثابت قدم ہیں اور قومی، انسانی اصولوں اور تاریخی ذمہ داری کے تحت فلسطین کے خلاف ہر قسم کے قبضے اور جارحیت کو مسترد کرتے ہیں۔ انہوں نے اسرائیل سے عادی سازی کی مخالفت پر وزیر اعظم محمد شیاع السودانی کے مؤقف کو سراہا۔

ادھر وزیر اعظم عراق نے بھی اسی تقریب میں دوٹوک انداز میں کہا کہ عراق کو اسرائیل سے عادی سازی کی ضرورت نہیں بلکہ باہمی بھائی چارے، محبت، پرامن بقائے باہمی اور آئین و شریعت کی پاسداری کی ضرورت ہے۔ ان کا کہنا تھا کہ عادی سازی اور سمجھوتے کی اصطلاح عراق کے سیاسی لغت میں شامل نہیں کیونکہ یہ ایک ایسے قابض نظام سے جڑی ہے جو انسانی وقار اور سرزمین کی حرمت کو پامال کرتا ہے، اور تمام آسمانی ادیان اس کی مخالفت کرتے ہیں۔