اسرائیل اور شام کی عبوری حکومت کے درمیان سکیورٹی معاہدہ آخری مرحلے میں کیوں ناکام ہوا؟

?️ 28 ستمبر 2025

اسرائیل اور شام کی عبوری حکومت کے درمیان سکیورٹی معاہدہ آخری مرحلے میں کیوں ناکام ہوا؟

العربیہ ٹی وی کے مطابق دونوں فریقین ایک معاہدے کے قریب پہنچ گئے تھے تاہم ذرائع نے خبر رساں ادارے روئٹرز کو بتایا کہ اسرائیل کی جانب سے شام کے جنوبی صوبہ السویدا تک ایک راہداری کھولنے کا مطالبہ، مذاکرات کی ناکامی کی بنیادی وجہ بنا۔

گزشتہ چند ہفتوں کے دوران امریکہ کی ثالثی میں باکو، پیرس اور لندن میں ہونے والے مذاکرات تیزی سے آگے بڑھے اور اقوام متحدہ کی جنرل اسمبلی کے اجلاس سے پہلے فریقین معاہدے کے عمومی نکات پر متفق ہو چکے تھے۔

اس معاہدے کا مقصد السویدا صوبے کو غیر فوجی علاقہ قرار دینا تھا۔ یاد رہے کہ جولائی میں یہاں عرب بدوی مسلح گروپوں اور شامی سرکاری فورسز کے درمیان جھڑپیں ہوئی تھیں، جبکہ دوسری جانب دروزی فرقے کے جنگجو اسرائیل کی حمایت میں متحرک تھے۔

شامی عبوری حکومت کے سربراہ ابومحمد الجولانی نے حالیہ دنوں میں مذاکرات پر اطمینان کا اظہار کیا تھا، جبکہ شام کے اقوام متحدہ میں نمائندے ابراہیم علی نے بھی العربیہ کو بتایا تھا کہ بات چیت آخری مراحل میں ہے۔

امریکی ایلچی ٹام باراک نے وضاحت کی تھی کہ یہ ایک "کمیِ تناؤ” کا معاہدہ ہوگا، جس کے تحت اسرائیل شامی اہداف پر حملے بند کرے گا، اور اس کے بدلے شام اس بات کی ضمانت دے گا کہ وہ اپنی سرحدوں کے قریب بھاری فوجی سازوسامان تعینات نہیں کرے گا۔

یاد رہے کہ بشار الاسد کی حکومت کے خاتمے کے بعد اسرائیلی فوج نے شامی فوجی تنصیبات پر حملوں میں اضافہ کیا ہے اور حالیہ مہینوں میں متعدد بار شامی مراکز کو نشانہ بنایا ہے۔ اس دوران اسرائیلی فوج، جولان کے قریبی علاقوں میں پیش قدمی کرتے ہوئے درعا اور قنیطرہ تک پہنچ چکی ہے اور اب اس کے دستے دمشق سے صرف 20 کلومیٹر کے فاصلے پر موجود ہیں۔