وائٹ ہاؤس میں کابل ایئرپورٹ دھماکے کی گونج، امریکی ریپبلکن نے جوبائیڈن سے استعفیٰ کا مطالبہ کردیا

?️ 29 اگست 2021

واشنگٹن (سچ خبریں) کابل ایئرپورٹ کے قریب ہونے والے دھماکے کی گونج وائٹ ہاؤس تک پہونچ گئی ہے اور امریکی ریپبلکن نے کابل دھماکے کے بعد جوبائیڈن حکومت سے مستعفی ہونے کا مطالبہ کردیا ہے۔

تفصیلات کے مطابق کابل ایئرپورٹ کے قریب ہونے والے دھماکے کے بعد نیکی ہیلی اوردیگرریپبلکن رہنماؤں نے امریکی صدر بائیڈن سے استعفے کا مطالبہ کرنا شروع کردیا ہے

امریکہ کی مسلح افواج کمیٹی کے رکن مارشل بلکبرن نے بھی سینئرامریکی عہدیداروں کے استعفے کا مطالبہ کیا ہے۔

وائٹ ہاؤس نے جو بائیڈن کے استعفے کے مطالبے پر ردعمل ظاہر کرتے ہوئے اعلان کیا ہے کہ اس وقت سیاسی کھیل کے لئے مناسب وقت نہیں ہے اور ہمیں ریپبلکن سے توقع ہے کہ وہ ہمارے ساتھ کھڑے رہیں گے۔

افغانستان میں 15 اگست کو اشرف غنی کی حکومت ختم ہونے اورطالبان کے تسلط کے بعد سے ہی بائیڈن پر امریکی فوجیوں کے غیرذمہ دارانہ انخلاء پر تنقیدیں ہو رہی تھیں تاہم کابل دھماکے اور اس میں 13 امریکی فوجیوں کی ہلاکت اور 18 کے زخمی ہونے کے بعد تنقیدوں میں شدت آگئی ہے۔