ہمیں بھی اسرائیل جیسی سکیورٹی ضمانت چاہیے:زلنسکی کا امریکہ سے مطالبہ !

سچ خبریں:یوکرین کے صدر ولادیمیر زلنسکی نے دعویٰ کیا ہے کہ کییف کو روایتی سکیورٹی گارنٹی کی بجائے واشنگٹن سے ایسی سیکیورٹی معاونت درکار ہے جیسی معاونت امریکہ، اسرائیل کو فراہم کرتا ہے۔

رشیا ٹوڈے کی رپورٹ کے مطابق اس بیان سے پہلے رپورٹس میں بتایا گیا تھا کہ یوکرین کے یورپی حامیوں نے ڈونلڈ ٹرمپ کے مجوزہ امن منصوبے کی کچھ شقوں پر تحفظات کا اظہار کیا ہے، انہیں حالات میں زلنسکی نے امریکہ سے مطالبہ کیا کہ وہ یوکرین کے لیے اسرائیلی ماڈل پر مبنی سکیورٹی امداد فراہم کرے۔

یہ بھی پڑھیں: روس یوکرین جنگ میں امریکی اتحادی کس کے ساتھ ہیں؟نیویارک ٹائمز کی رپورٹ

واشنگٹن نے پیرس میں جاری مذاکرات کے دوران، یوکرین اور روس کے درمیان جنگ کے خاتمے کے لیے اپنا مجوزہ امن منصوبہ پیش کیا۔

 رپورٹس کے مطابق، اس کے فوراً بعد لندن میں نیٹو رکن ممالک اور یوکرینی حکام کی ایک میٹنگ ہوئی، جس میں انہوں نے اپنی متبادل تجاویز پیش کیں۔

زلنسکی نے صحافیوں سے گفتگو کرتے ہوئے کہا کہ کسی بھی ممکنہ صلح معاہدے کو امریکہ کی عسکری، مالی اور سیاسی حمایت حاصل ہونی چاہیے۔

انہوں نے مزید کہا کہ لندن میں ہونے والی گفتگو کا مرکز امریکہ کی جانب سے دی جانے والی سیکیورٹی ضمانتیں تھیں۔ ہمیں امید ہے کہ یہ ضمانتیں اتنی ہی قابل اعتماد ہوں گی جتنی اسرائیل کو فراہم کی گئی ہیں۔

انہوں نے مزید کہا کہ یوکرین اپنے یورپی شراکت داروں سے بھی اسی قسم کی حمایت کی توقع رکھتا ہے اور سیکیورٹی ضمانتوں کے لیے ضروری انفراسٹرکچر تیار کرنے پر کام کر رہا ہے۔

قابل ذکر ہے کہ یوکرین کے لیے اسرائیلی ماڈل جیسی حمایت کی بات سب سے پہلے جو بائیڈن کی صدارت کے دوران سامنے آئی تھی، جب مغربی ممالک اس حقیقت کو تسلیم کرنے لگے کہ یوکرین کا نیٹو میں شامل ہونا ممکن نہیں رہا۔

اس کے بجائے، وہ یوکرین کے لیے طویل مدتی اسلحہ جات کی فراہمی اور مالی امداد کو یقینی بنانے کے راستے تلاش کر رہے تھے۔

زلنسکی کے یہ بیانات ایسے وقت میں سامنے آئے ہیں جب کییف اور واشنگٹن کے درمیان اختلافات شدت اختیار کر چکے ہیں۔

مزید پڑھیں: یوکرین جنگ سے پیسہ کمانے پر یورپی یونین کی امریکہ پر کڑی تنقید

رپورٹس کے مطابق، ٹرمپ نے یوکرین سے مطالبہ کیا ہے کہ وہ آخری تجویز کو قبول کرے۔ اس تجویز میں موجودہ محاذی خطوط پر جنگ بندی، اور کریمیا کو روسی سرزمین کے طور پر تسلیم کرنا شامل ہے ایک شرط جسے زلنسکی نے سختی سے مسترد کر دیا ہے۔