امریکہ کا اپنے شہریوں کو دنیا میں کہیں بھی سفر کرنے پر انتباہ

?️ 19 جولائی 2026

سچ خبریں:امریکہ کی وزارت خارجہ نے مشرق وسطیٰ میں بڑھتی ہوئی کشیدگی اور غیر متوقع حالات کے خدشے کے پیش نظر دنیا بھر میں سفر کرنے والے امریکی شہریوں کو زیادہ احتیاط برتنے کی ہدایت کی ہے۔ اس دوران ایران اور امریکہ کے درمیان جاری کشیدگی کے باعث فوجی اور انسانی نقصانات کی اطلاعات بھی سامنے آئی ہیں۔

امریکہ کی وزارت خارجہ نے ہفتے کی شام دنیا بھر میں سفر کرنے والے امریکی شہریوں کو ہدایت کی ہے کہ مشرق وسطیٰ میں بڑھتی ہوئی کشیدگی اور غیر متوقع حالات میں مزید شدت آنے کے امکان کے پیش نظر زیادہ احتیاط سے کام لیں۔

وزارت خارجہ کی جانب سے جاری کیا گیا یہ انتباہ امریکہ کے ایران پر تازہ فضائی حملوں سے قبل جاری کیا گیا تھا، تاہم اس کے بعد خطے میں کشیدگی مزید بڑھ گئی ہے۔

رپورٹ کے مطابق یہ صورتحال اس بات کی بھی عکاسی کرتی ہے کہ اگرچہ یہ جنگ امریکہ کے اندر بہت سے شہریوں کو دور محسوس ہوتی ہے، لیکن اس کے اثرات براہ راست امریکی عوام تک پہنچ رہے ہیں۔ ایندھن کی قیمتوں میں اضافے کے باعث معاشی اثرات نمایاں ہو رہے ہیں، جبکہ اس تنازع میں امریکی فوجی اہلکار بھی ہلاک ہوئے ہیں۔

اس سے قبل امریکہ کی مرکزی کمان، سینٹکام، نے اعلان کیا تھا کہ اردن میں واقع ایک امریکی فوجی اڈے پر ایران کے حملے کے دوران 2 امریکی فوجی ہلاک جبکہ ایک فوجی لاپتا ہو گیا۔

سینٹکام کے مطابق مزید 4 امریکی فوجی زخمی ہوئے، جن میں سے بعض کو طبی امداد فراہم کرنے کے بعد اسپتال سے فارغ کر دیا گیا۔

رپورٹ میں کہا گیا ہے کہ گزشتہ چند روز کے دوران امریکہ کی نئی فوجی کارروائیاں زیادہ تر ایران کے جنوبی صوبوں پر مرکوز رہی ہیں، جہاں زیادہ تر شہری بنیادی ڈھانچے کو نشانہ بنایا گیا۔

ایران کی وزارت صحت نے گزشتہ روز اعلان کیا تھا کہ ان حملوں کے نتیجے میں اب تک 50 افراد شہید اور 500 سے زائد زخمی ہو چکے ہیں۔

ایران کی مسلح افواج کے سپریم کمانڈر کے سینئر عسکری مشیر محسن رضائی نے خبردار کیا ہے کہ اگر آئندہ چند روز کے دوران امریکہ کے حملے جاری رہے تو تہران دوبارہ مکمل جارحانہ فوجی کارروائیاں شروع کرے گا۔