صہیونی ماہرین، ڈاکٹرز اور سرمایہ کاروں کی غیر معمولی نقل مکانی؛ صیہونی معیشت کے مستقبل پر تشویش

?️ 21 اکتوبر 2026

سچ خبریں:صہیونی اخبار ہارٹیز نے مقبوضہ فلسطینی علاقوں سے صہیونی ماہرین کی غیر معمولی نقل مکانی پر تشویش ظاہر کی ہے۔ ان افراد میں بالخصوص سائنس دان، سرمایہ کار اور انجینئر شامل ہیں۔

عبرانی اخبار ہارٹیز نے مقبوضہ فلسطینی علاقوں سے سائنس دانوں، ڈاکٹروں، انجینئروں اور سرمایہ کاروں کی ریکارڈ سطح پر نقل مکانی پر تشویش ظاہر کی ہے۔ رپورٹ کے مطابق، 2025 میں نقل مکانی کرنے والے صہیونیوں کی تعداد تقریباً 70 ہزار تک پہنچ گئی، جبکہ اعلیٰ تعلیم یافتہ ماہرین کے انخلا سے صیہونی معیشت اور قومی سلامتی کو خطرات لاحق ہونے کا خدشہ ہے۔

عبرانی زبان کے اخبار ہارٹیز نے اپنے اقتصادی ضمیمے مارکر میں لیور داتال کی تحریر کردہ ایک رپورٹ میں بتایا ہے کہ بنیامین نیتن یاہو کی موجودہ حکومت کے قیام کے بعد سے مقبوضہ علاقوں سے نقل مکانی کے اعداد و شمار غیر معمولی اور ریکارڈ سطح تک پہنچ گئے ہیں۔

رپورٹ میں اس بات پر زور دیا گیا ہے کہ صہیونی حکومت کے آئندہ انتخابات کے نتائج اس امر کا تعین کریں گے کہ اس حکومت کی معیشت انسانی وسائل اور مالی سرمائے کے اس مسلسل انخلا کا مقابلہ کرنے کی کتنی صلاحیت رکھتی ہے۔

اس صہیونی رپورٹ میں پیش کی گئی ایک تحقیق کے مطابق، مقبوضہ علاقوں سے نقل مکانی کے اشاریے خطرناک حدود سے تجاوز کرچکے ہیں۔ ان میں سے چند اہم نکات درج ذیل ہیں:

نقل مکانی کرنے والوں کی تعداد میں اضافہ:

2025 میں نقل مکانی کرنے والے صہیونیوں کی تعداد تقریباً 70 ہزار تک پہنچ گئی، جبکہ 2009 سے 2013 کے دوران اس کی سالانہ اوسط 40 ہزار سے کم تھی۔

مقبوضہ علاقوں میں واپسی کی شرح میں نمایاں کمی:

2024 میں مقبوضہ علاقوں میں نقل مکانی کرکے آنے والے صہیونیوں کی تعداد کم ترین سطح پر ریکارڈ کی گئی اور یہ سالانہ 20 ہزار سے بھی نیچے آگئی۔

نقل مکانی کا منفی خالص توازن:

گزشتہ دہائی کے دوران خالص نقل مکانی کا منفی توازن سالانہ 10.5 ہزار افراد تھا، جو 2024 میں بڑھ کر تقریباً 30 ہزار افراد تک پہنچ گیا۔ یوں یہ تعداد تقریباً تین گنا ہوگئی۔

مقبوضہ علاقوں سے ماہرین اور ڈاکٹروں کا انخلا

ہارٹیز کی رپورٹ سے ظاہر ہوتا ہے کہ نقل مکانی کرنے والوں میں سب سے زیادہ تناسب پیشہ ور ماہرین، جامعات سے وابستہ افراد اور اعلیٰ انسانی صلاحیتوں کے حامل لوگوں کا ہے۔ اعلیٰ تعلیم یافتہ افراد اور ماہرین کے انخلا کی رفتار مجموعی نقل مکانی کی اوسط شرح سے زیادہ تیزی سے بڑھی ہے۔

ڈاکٹروں کی نقل مکانی:

2023 سے 2025 کے درمیان تقریباً 1400 ڈاکٹر مقبوضہ علاقوں سے نقل مکانی کرگئے۔ یہ تعداد اس سے ایک دہائی قبل کے اسی دورانیے میں ریکارڈ کیے گئے اعداد و شمار سے دو گنا ہے۔

ٹیکنالوجی کے ماہرین کا انخلا:

انجینئرز، کمپیوٹر سائنس اور بنیادی سائنسی علوم کے ماہرین کی نقل مکانی کی شرح میں تقریباً دو گنا اضافہ ہوا ہے۔

نوجوان خاندان:

35 سے 45 سال کی عمر کے افراد اور 14 سال سے کم عمر بچوں میں نقل مکانی کی شرح دو گنا ہوگئی ہے۔

سرمایہ کار اور زیادہ آمدنی والے افراد:

مقبوضہ علاقوں سے نقل مکانی کرنے والوں میں آمدنی کے لحاظ سے بلند ترین ایک تہائی طبقے سے تعلق رکھنے والے افراد کا تناسب 2024 میں مجموعی تارکینِ وطن کا 33.5 فیصد تک پہنچ گیا۔

اعلیٰ صلاحیتوں کے حامل افراد کے انخلا کے دیرپا نقصانات

ہارٹیز نے صہیونی حکومت کے محکمۂ ٹیکس کے اعداد و شمار کا حوالہ دیتے ہوئے رپورٹ کیا ہے کہ اس نقل مکانی کے نتیجے میں سالانہ ٹیکس آمدنی کو پہنچنے والا نقصان 2019 میں 500 ملین شیکل سے بڑھ کر 2024 میں 1.2 ارب شیکل ہوگیا۔

 پیش گوئی کی گئی ہے کہ آئندہ پانچ برسوں میں یہ نقصان سالانہ 3.5 ارب شیکل سے بھی تجاوز کرسکتا ہے۔

صیہونی اکیڈمی آف سائنسز کے سربراہ پروفیسر ڈیوڈ ہارل نے خبردار کیا ہے کہ انجینئرنگ، سائبر سکیورٹی اور مصنوعی ذہانت کے شعبوں سے ماہرین کا انخلا اسرائیل کے قومی استحکام اور فوجی سلامتی کے لیے براہِ راست خطرہ ہے۔