برطانیہ اور بھارت کا انسدادِ دہشت گردی تعاون بڑھانے پر اتفاق

سچ خبریں:برطانوی وزیرِ خارجہ ڈیویڈ لَمی اور بھارتی وزیرِ اعظم نریندر مودی نے نئی دہلی میں ملاقات کی جس میں دہشت گردی سے نمٹنے، معلومات کے تبادلے اور آزاد تجارتی معاہدے کی جلد تکمیل پر زور دیا۔

روئٹرز نیوز ایجنسی کی رپورٹ کے مطابق برطانیہ کے وزیرِ خارجہ ڈیویڈ لَمی نے بھارتی وزیرِ اعظم نریندر مودی سے دارالحکومت نئی دہلی میں ملاقات کی اور دونوں ممالک کے مابین انسدادِ دہشت گردی کے شعبے میں تعاون کو وسعت دینے پر تبادلۂ خیال کیا۔

یہ بھی پڑھیں: کشمیریوں کو ان کے بنیادی انسانی حقوق سے محروم کردیاگیا ہے:فاروق رحمانی

یہ دورہ ایک ایسے وقت میں ہو رہا ہے جب بھارت اور پاکستان نے گزشتہ ماہ تیس برس کی بدترین جھڑپوں کے بعد جنگ بندی پر اتفاق کیا۔ کشیدگی کا آغاز اس واقعے سے ہوا تھا جب بھارتی زیرِ انتظام کشمیر میں 26 افراد ہلاک ہوئے ایک سانحہ جس کا ذمہ دار نئی دہلی نے پاکستان کی پشت پناہی سے کام کرنے والے دہشت گرد گروہوں کو ٹھہرایا، تاہم اسلام آباد نے یہ الزام مسترد کر دیا۔

اس واقعے کے بعد بھارت نے پاکستان کی سرزمین پر موجود جن ٹھکانوں کو وہ دہشت گردی کا ڈھانچہ قرار دیتا ہے، ان پر حملے کیے۔ ان کارروائیوں کے نتیجے میں تناؤ انتہائی بڑھ گیا، تا آنکہ 20 مئی کو دونوں ممالک جنگ بندی پر متفق ہو گئے۔

ڈیویڈ لَمی نے گفتگو میں کہا، ہم موجودہ صورتِ حال کو برقرار رکھنا چاہتے ہیں، لیکن ہمیں اس کی نزاکت کا بخوبی ادراک ہے، خاص طور پر ایسے میں جب بھارت کو غیر مستحکم کرنے کے لیے دہشت گردی کا سنگین خطرہ موجود ہے۔

برطانوی وزیرِ خارجہ نے مزید کہا، ہم اپنے بھارتی شراکت داروں کے ساتھ دہشت گردی کے خاتمے کے لیے تعاون جاری رکھنے کے خواہاں ہیں۔

لَمی نے بھارتی ہم منصب سُبرامنیم جے شنکر سے بھی ملاقات کی اور آئندہ اقدامات پر مشاورت کی، تاہم تفصیلات ظاہر نہیں کیں۔

گزشتہ سال دونوں ملک دہشت گردی کی مالی معاونت کے انسداد، عدالتی تعاون اور معلومات کے تبادلے کے حوالے سے مشاورتی اجلاس منعقد کر چکے ہیں۔

مزید پڑھیں:انسانی حقوق کے چیمپیئن بننے والے کشمیر کی صورتحال پر خاموش کیوں ہیں، بلاول بھٹو

برطانوی وزیرِ خارجہ نے اس امید کا اظہار بھی کیا کہ آزاد تجارتی معاہدہ (FTA)، جس کے مذاکرات گزشتہ ماہ مکمل ہوئے، جلد حتمی شکل پائے گا، ان کا کہنا تھا، وزیرِ اعظم کیئر سٹارمر اس معاہدے پر دستخط کے لیے بھارت کا دورہ کرنے کے منتظر ہیں۔ دونوں ممالک کے درمیان تعاون کے مواقع وسیع ہیں۔