شامی شہریوں کے گھروں پر دہشت گردوں کے حملے؛عیسائی شہریوں میں غم و غصہ

?️ 29 دسمبر 2024

سچ خبریں:دمشق کے نواحی علاقے معلولا میں بڑھتی ہوئی بدامنی اور دہشت گرد عناصر کی جانب سے شامی شہریوں کے گھروں پر حملوں نے مقامی عیسائی برادری کو نقل مکانی پر مجبور کر دیا ہے۔

روزنامہ النهار کی رپورٹ کے مطابق، معلولا، جو عیسائی اکثریتی علاقہ ہے، گزشتہ روز شدید تناؤ اور جھڑپوں کا شکار رہا جہاں ایک نقاب پوش شخص نے مقامی زمیندار کی زمینوں پر حملہ کیا، گولیاں چلائیں، اور زمین کے مالک کو ہلاک کر دیا۔ اس واقعے نے علاقے کے مکینوں کو شدید احتجاج پر مجبور کر دیا ہے۔

یہ بھی پڑھیں: ترکی اور امریکہ کا شام کے مستقبل میں کردار ادا کرنے پر تبادلہ خیال

تشدد کے ساتھ ساتھ ہیئت تحریر الشام کے دہشت گردوں نے ان افراد کے خلاف وسیع پیمانے پر گرفتاریوں کا آغاز کیا ہے، جن پر بشار الاسد کی حکومت سے تعلق رکھنے کا الزام عائد کیا جا رہا ہے۔

درایں اثنا دہشت گرد عناصر نے علاقے کے سیاسی اور سماجی کارکنان سمیت مشہور شخصیات کو مختلف الزامات کے تحت گرفتار کر لیا ہے۔

مقامی شہریوں نے دہشت گردوں کی جانب سے گھروں پر حملوں، دروازے توڑنے اور شہریوں کو گرفتار کرنے پر شدید تنقید کی ہے۔

قابل ذکر ہے کہ معلولا میں ڈکیتی اور دیگر جرائم کی شرح میں خطرناک حد تک اضافہ ہو چکا ہے، جس کی وجہ سے متعدد مکینوں نے علاقہ چھوڑنے کا فیصلہ کیا ہے۔

سوشل میڈیا پر وائرل ہونے والی ویڈیوز میں دکھایا گیا ہے کہ معلولا کے عیسائی باشندے زبردستی علاقے سے نکلنے پر مجبور ہیں۔

مزید پڑھیں: شام میں مسلح گروہوں کے درمیان اختلافات میں شدت ؛الجولانی کی کرد ڈیموکریٹک فورسز کو وارننگ

بشار الاسد کی حکومت کے زوال اور شام میں بدامنی کے پھیلاؤ کے بعد اس ملک کے مختلف حصوں میں اب تک 140 سے زائد افراد اپنی جانوں سے ہاتھ دھو بیٹھے ہیں۔