شمالی امریکی ملک میکسیکو میں پولیس قافلے پر حملہ، ایک درجن سے زائد افراد ہلاک ہوگئے

🗓️ 20 مارچ 2021

میکسیکو (سچ خبریں) شمالی امریکی ملک میکسیکو میں پولیس قافلے پر نامعلوم افراد نے حملہ کردیا جس کے نتیجے میں ایک درجن سے زائد افراد ہلاک جبکہ تین زخمی ہوگئے ہیں ہلاک ہونے والوں میں 5سرکاری ملازم شامل ہیں۔

تفصیلات کے مطابق شمالی امریکی ملک میکسیکو میں پولیس قافلے پر حملے کے نتیجے میں 13 اہلکار ہلاک ہوگئے، حملہ اس وقت ہوا جب پولیس کا قافلہ گشت پر مامور تھا، جس علاقے میں حملہ کیا گیا وہاں مسلح گروہ اور جرائم پیشہ افراد نے اپنی آماج گاہ بنائی ہوئی ہے۔

اطلاعات کے مطابق واقعہ ملک کے جنوبی شہر حرینہ میں پیش آیا اور نامعلوم مسلح افراد نے گھات لگا کر وزارتی ملازمین کی حفاظت پر مامور پولیس قافلے کو نشانہ بنایا، ہلاک ہونے والوں میں 5سرکاری ملازم شامل ہیں۔

کارروائی کے بعد حملہ آور جائے وقوع سے فرار ہونے میں کامیاب ہو گئے، مقامی حکام کا کہنا ہے کہ حملہ آور منشیات کی اسمگلنگ کرنے والے گروہ سے تعلق رکھتے ہیں۔

پولیس قافلے پر حملے کے بعد میکسیکو نیشنل گارڈ اور دیگر سکیورٹی فورسز کی بڑی تعداد کو طلب کرکے بڑے پیمانے پر حملہ آروں کی تلاش کے لیے آپریشن شروع کردیا گیا ہے۔