جنوبی لبنان کے خلاف صیہونی جارحیت پر لبنانی عہدیداروں کا ردعمل

سچ خبریں:لبنانی صدر اور وزیراعظم نے اسرائیلی حملوں پر سخت ردعمل کا اظہار کرتے ہوئے اس جارحیت کو اپنے ملک کی خودمختاری کی خلاف ورزی اور امن کے لیے خطرہ قرار دیا۔

لبنانی صدر جوزف عون اور وزیراعظم نواف سلام نے جنوبی لبنان پر اسرائیلی حملوں کی سخت الفاظ میں مذمت کرتے ہوئے اسے لبنانی خودمختاری اور خطے کے استحکام کے خلاف قرار دیا،لبنان کے صدر اور وزیر اعظم نے جنوبی لبنان، خصوصاً نبطیہ اور اقلیم التفاح پر اسرائیلی حملوں کی شدید مذمت کی ہے اور ان حملات کو خودمختاری کی کھلی خلاف ورزی قرار دیا ہے۔

یہ بھی پڑھیں: کیا اقوام متحدہ اسرائیل سے محفوظ ہے؟ یورپی یونین کی زبانی

لبنانی خبررساں ادارے النشرہ کے مطابق، لبنان کے صدر جوزف عون نے اسرائیلی افواج کی جانب سے نبطیہ، اقلیم التفاح اور دیگر علاقوں پر مسلسل حملوں اور سیزفائر کی خلاف ورزی پر سخت ردعمل دیتے ہوئے کہا کہ اسرائیل کی جانب سے لبنان کی خودمختاری کی مسلسل خلاف ورزی قابل مذمت ہے،انہوں نے مزید کہا کہ اسرائیل نے نہ صرف بین الاقوامی قراردادوں بلکہ خطے اور عالمی برادری کی جانب سے تشدد روکنے اور کشیدگی میں کمی کی اپیلوں کو بھی نظر انداز کر رکھا ہے۔

صدر عون نے زور دیا کہ عالمی برادری کو چاہیے کہ وہ ان حملوں کو روکنے کے لیے مؤثر اقدام کرے، کیونکہ یہ کاروائیاں لبنان اور خطے میں استحکام کے لیے جاری کوششوں کی راہ میں رکاوٹ ہیں،لبنان کے وزیراعظم نواف سلام نے بھی ان حملوں پر شدید غم و غصہ کا اظہار کرتے ہوئے کہا کہ میں نبطیہ کے نواحی علاقوں پر اسرائیل کے حملوں کی سخت مذمت کرتا ہوں، یہ کارروائیاں لبنان کی خودمختاری اور جنگ بندی معاہدے کی صریح خلاف ورزی ہیں۔

مزید پڑھیں: اسرائیل لبنان میں ہماری سرگرمیوں میں خلل ڈال رہا ہے:یونیفل

انہوں نے مزید کہا کہ یہ حملے لبنان کے امن و استحکام کے لیے ایک سنگین خطرہ ہیں،واضح رہے کہ چند گھنٹے قبل، صہیونی ریاست نے جنوبی لبنان کے مختلف علاقوں پر شدید بمباری کی تھی، جس کے نتیجے میں نہ صرف شہری املاک کو نقصان پہنچا بلکہ متعدد عام شہری بھی متاثر ہوئے۔